İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 525 Hüküm no: 619 Orijinal metin no: [93a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe b. Mehmed’in, Ahmed Ağa b. Ahmed aleyhine açtığı kahve gediği davasının reddedildiği Tarakçılarda kahve gediği şuf‘a da‘vâsı şer‘an mesmû‘a olmayıp men‘ Ma‘rûz Hüseyin Beşe b. Mehmed nâm kimesne meclis-i şer‘-i münîrde Kahveci Mustafa Ağa b. el-Hâc Ali hâzır olduğu hâlde kaşıkçılar kethüdâsı Ahmed Ağa b. Ahmed muvâcehesinde İstanbul’da Tarakçılar sûkunda vâki‘ bir bâb kahve dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin nısfı benim ve nısf-ı âharı hâzır-ı merkūm Mustafa’nın yedimizde iştirâken ve şâyi‘an mülkümüz iken mezbûr Mustafa Ağa âlât-ı lâzıme-i merkūmeden nısf hissesini işbu mezbûr Ahmed Ağa’ya bin beş yüz guruş semen tesmiyesiyle bey‘ ve temlîk ol dahi iştirâ ve temellük ve kabûl eylediği mesmû‘a oldukda mücîz olmayıp ittihâz-ı şuf‘a etmemle medfû‘ olan semen-i merkūmu benden alıp nısf-ı âlât-ı lâzıme-i mezkûreyi bana versin deyü takrîr-i meşrûhu üzere âlât-ı lâzıme-i merkūme menkūlât kabîlinden olup ve menkūlâtda şuf‘a câriye olmamağla mütâlebeye kādir olmadığı kendiye ba‘de’t-tefhîm merkūm Ahmed Ağa rızâsıyla nısf-ı âlât-ı lâzıme-i mezkûreyi ol mikdâr semen ile müdde‘î-i merkūm Hüseyin Beşe’ye bey‘ edecek oldukda istemem deyip ibâ etmekle dönüp ben yedimde mülküm olan nısf-ı âlât-ı lâzıme-i mezkûreyi hâzır-ı merkūm Mustafa’dan bin beş yüz elli guruşa iştirâ etmişdim bu def‘a nısf-ı âharını mezbûr Ahmed Ağa’ya bin beş yüz guruşa bey‘ etmekle mukâyese olundukda benden ziyâde me’hûzu olan elli guruşu hâzır-ı merkūm Mustafa’dan istirdâd ederim deyü takrîri üzere tasaddî eylediği da‘vâ-yı mezkûresi dahi şer‘an mesmû‘a ve iltifâta şâyân olmamağla bî-vech mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-19 min Za sene [1]217