İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 526 Hüküm no: 620 Orijinal metin no: [93b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Hüseyin Beşe b. Feyzullah’ın, Hüseyin Ağa b. Osman’a olan borcunu ödemesi gerektiği Mürâca‘a ile kefâletine 1.921 guruş hüküm Ma‘rûz Mehterbaşı Hüseyin Ağa b. Osman nâm kimesne meclis-i şer‘-i münîrde duhân tüccârından es-Seyyid Ahmed Ağa b. el-Hâc Mustafa hâzır olduğu hâlde Tütüncü Hüseyin Beşe b. Feyzullah muvâcehesinde hâzır-ı mezbûr es-Seyyid Ahmed Ağa’nın merkūm Hüseyin Beşe zimmetinde vezn ve fiyatı beynlerinde ma‘lûm duhân semeninden gayr-ez teslîmât sahhe’l-bâkī bâ-temessük hakkı olan bin dokuz yüz yirmi bir guruşa ben merkūm Hüseyin Beşe’nin emriyle kefîl ve zâmin olduğumdan sonra meblağ-ı mezkûru hâzır-ı mezbûr es-Seyyid Ahmed Ağa kefâletine binâen benden bâ-i‘lâm-ı şer‘î ahz etmekle ben dahi meblağ-ı mezkûr bin dokuz yüz yirmi bir guruşu merkūm Hüseyin Beşe’den bi’l-mürâca‘a hâlâ taleb ederim deyü hâzır-ı mezbûrun tasdîkiyle da‘vâ ettikde ol dahi cevâbında ber-vech-i meşrûh emriyle müdde‘î-i merkūm Hüseyin Ağa’nın kefîl olduğunu ve kefâlet-i mezkûreye binâen ol mikdâr guruşu hâzır-ı mezbûr es-Seyyid Ahmed Ağa’ya def‘ ve teslîmini kat‘iyyen ve tâyi‘an ikrâr u i‘tirâf etmeğin alâ-mûceb-i i‘tirâfihî meblağ-ı mezbûr bin dokuz yüz yirmi bir guruşu müdde‘î-i merkūm Hüseyin Ağa’ya edâsıyla mezbûr Hüseyin Beşe ilzâm olunduğu tescîl ve İstanbul Mahkemesi’nden huzûr-ı âlîlerine i‘lâm olundu. Fî-27 min Za sene 1217