İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 528 Hüküm no: 622 Orijinal metin no: [93b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Top arabacıları çorbacısı İsmail Ağa b. İbrahim’in terekesinin taksim edildiği; İslam Beşe b. Hasan’ın İsmail Ağa’ya olan borcunu vârislerinden Zeliha bt. Musa’ya ödemesi gerektiği 1.280 guruş hüküm Ma‘rûz İstanbul’da Macunî Kasım Mahallesi ahâlîsinden olup bin iki yüz on senesinde hacc-ı şerîfe azîmet ve avdetde esnâ-yı tarîkde fevt olan top arabacıları çorbacısı el-Hâc İsmail Ağa b. İbrahim nâm kimesnenin verâseti zevce-i menkûha-i metrûkesi Zeliha bt. İbrahim nâm Hatun ile mezbûreden mütevellîdler sulbî evlâd-ı sıgārı Mehmed Tahir ve Esma ve zevce-i mutallakası diğer Zeliha bt. Musa nâm hatundan mütevellîd sulbî sagīr oğlu İbrahim Edhem’e münhasıra ve tashîh-i meselesi kırk sehmden olup sihâm-ı mezbûreden beş sehmi zevcesi mezbûre Zeliha Hatun ve on dörder sehmi sagīrân-ı mezbûrân Mehmed Tahir ve İbrahim Edhem her birine ve yedi sehmi sagīre-i mezbûre Esma’ya isâbeti tahakkukundan sonra husûs-ı âtîde kendi nefsinden asîl ve sagīrân-ı mezbûrân Mehmed Tahir ve Esma’nın vâlidesi ve bâ-hüccet mansûbe vasîleri sâhibe-i arzuhâl mu‘arrefetü’z-zât mezbûre Zeliha Hatun meclis-i şer‘-i münîrde habbâz tâifesinden derûn-ı arzuhâlde mezkûrü’l-ism İslâm Beşe b. Hasan muvâcehesinde zevcim mûrisimiz müteveffâ-i mezbûr el-Hâc İsmail Ağa’nın İstanbul’da Şehremini nâm mahalde vâki‘ ekmekçi fırını ustaları gāibân ani’l-beled Artin ve Agob [94a] zimmîler zimmetlerinde cihet-i karzdan üç bin altı yüz guruş alacak hakkı olmağla bin iki yüz dokuz senesinde zimmîyân-ı mesfûrân mâlikler oldukları fırın-ı mezkûr gediği tâ‘bir olunan âlât-ı lâzıme-i ma‘lûmeyi habbâzân kethüdâsı ve nizâm ustaları ma‘rifetleriyle işbu merkūm İslâm Beşe ile gāibân ani’l-meclis şürekâsı Yunus Beşe b. Abdullah ve Şaban Beşe b. Abdullah nâm kimesnelere semen-i ma‘lûme bey‘ ve temlîk ve teslîm etmeleriyle onlar dahi iştirâ ve temellük ve tesellüm ve kabûl eylediklerinden sonra zimmîyân-ı mesfûrân dâyînleri mûrisimiz müteveffâ-i mezbûru hayatında deyn-i mezkûrlarıyla medyûnları mezbûrûn İslâm Beşe ve Şaban ve Yunus Beşeler üzerlerine havâle-i sahîha ile havâle ve her biri havâle-i mezkûreyi ba‘de’l-kabûl merkūm İslâm Beşe ile şerîkleri gāibân-ı mezbûrân Yunus ve Şaban Beşeler cihet-i havâle-i mezkûreden mûrisimiz müteveffâ-i mezbûr el-Hâc İsmail Ağa’ya deynleri olan meblağ-ı merkūmdan her biri âharların hisselerine lâzım gelen meblağa kefîl ve zâmin olup meblağ-ı mezkûr vech-i meşrûh üzere zimmetlerinde deynleri olduğunu müşir karz ünvanıyla işbu bir kıt‘a temessüka i‘tâ eylediklerinden sonra meblağ-ı mezkûr üç bin altı yüz guruşun bin iki yüz guruşunu merkūm İslâm Beşe mûrisimiz müteveffâ-i mezbûra hayatında edâ ve teslîm ve temessük-ı mezkûr zahrına kaydolunup ve iki yüz guruşunu dahi zevcim mezbûrun kezâlik hayatında emriyle bana teslîm etmekle ol vechile cem‘an bin dört yüz guruşunu hayatında istîfâ ve mâ‘adâsı olan iki bin iki yüz guruşu kable’l-ahz ve’l-istîfâ fevt ve meblağ-ı bâkī-i mezkûr benimle evlâd-ı sıgārı mezbûrûna mevrûs olmağla meblağ-ı bâkī-i mezkûr iki bin iki yüz guruşdan ber-mûceb-i tashîh-i mezkûr benimle vasîleri olduğum sagīrân-ı mezbûrân Mehmed Tahir ve Esma’nın hisselerimize isâbet eden bin dört yüz otuz guruşun yüz elli guruşunu merkūm İslâm Beşe bundan akdemce bana edâ ve teslîm ben dahi yedinden bi’l-asâle ve bi’l-vesâye ahz u kabz etmemle bâkīsi olan bin iki yüz seksen guruşu asâlet ve kefâlet-i mezkûresine binâen merkūm İslâm Beşe’den bi’l-asâle ve bi’l-vesâye hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu bi-tamâmihâ tâyi‘an ve kat‘iyyen ikrâr u i‘tirâf edip lâkin fırın-ı mezkûrda ekmekçi olduğum müddetde benim külliyetli zarar ve hasâretim olup fırın-ı mezkûru terk edip hâlâ mesdûd olmağla bundan böyle fırın-ı mezkûr esnâf ma‘rifetiyle her kime tahmîl olunup gedik-i mezkûru kim kabûl ederse deynim mezkûru dahi ol kimesneden taleb eylesinler ben vermem demesi meşrû‘ ve müvecceh olmamağla iltifât olunmayıp alâ-mûceb-i i‘tirâfihî meblağ-ı bâkī-i mezkûrdan zevce-i mezbûre ile sagīrân-ı mezbûrânın hisse-i bâkīyyeleri olan bin iki yüz seksen guruşu müdde‘iye-i asîl ve vasî-i mezbûre Zeliha Hatun’a asâlet ve kefâletine binâen edâsıyla merkūm İslâm Beşe ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-25 min Za sene [1]217