İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 530 Hüküm no: 623 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Toparabacıları çorbacısı İsmail Ağa b. İbrahim’in terekesinin taksim edildiği; İslam Beşe b. Hasan’ın İsmail Ağa’ya olan borcunu vârislerine ödemesi gerektiği 770 guruş hüküm Ma‘rûz İstanbul’da Ma‘cunî Kasım Mahallesi ahâlîsinden olup bin iki yüz on senesinde hacc-ı şerîfe azîmet ve avdetde esnâ-i tarîkde fevt olan top arabacıları çorbacısı el-Hâc İsmail Ağa b. İbrahim nâm kimesnenin verâseti zevce-i menkûha-i metrûkesi Zeliha bt. İbrahim nâm Hatun ile mezbûreden mütevellidler sulbî evlâd-ı sıgārı Mehmed Tahir ve Esma ve zevce-i mutallakası diğer Zeliha bt. Musa nâm hatundan mütevellîd sulbî sagīr oğlu İbrahim Edhem’e münhasıra ve tashîh-i meselesi kırk sehmden olup sihâm-ı mezbûreden beş sehmi zevcesi mezbûre Zeliha Hatun’a ve on dörder sehmi sagīrân-ı mezbûrân Mehmed Tahir ve İbrahim Edhem’den her birine ve yedi sehmi sagīre-i mezbûre Esma’ya isâbeti tahakkukundan sonra sagīr-i mezbûr İbrahim Edhem’in vâlidesi ve bâ-hüccet mansûbe vasîsi mu‘arrefetü’z-zât mezbûre Zeliha Hatun meclis-i şer‘-i münîrde habbâz tâifesinden İslâm Beşe b. Hasan muvâcehesinde vasîsi olduğum oğlum sagīr-i mezbûrun babası müteveffâ-i mezbûr el-Hâc İsmail Ağa’nın İstanbul’da Şehremini nâm mahalde vâki‘ etmekçi fırını ustaları gāibân ani’l-beled Artin ve Agob zimmîler zimmetlerinde cihet-i karzdan üç bin altı yüz guruş alacak hakkım olmağla bin iki yüz dokuz senesinde zimmîyân-ı mesfûrân mâlikler oldukları fırın-ı mezkûr gediği tâ‘bir olunan âlât-ı lâzıme-i ma‘lûmeyi habbâzân kethüdâsı ve nizâm ustaları ma‘rifetleriyle işbu merkūm İslâm Beşe ile gāibân ani’l-meclis şürekâsı Yunus Beşe b. Abdullah ve Şaban Beşe b. Abdullah nâm kimesnelere semen-i ma‘lûme bey‘ ve temlîk ve teslîm etmeleriyle onlar dahi iştirâ ve temellük ve tesellüm ve kabûl eylediklerinden sonra zimmîyân-ı mesfûrân dâyînleri müteveffâ-i mezbûr hayatında deyn-i mezkûrlarıyla medyûnları mezbûrûn İslâm ve Yunus ve Şaban Beşeler üzerlerine havâle-i sahîha ile havâle ve her biri havâle-i mezkûreyi ba‘de’l-kabûl merkūm İslâm Beş ile şerîkleri gāibân-ı mezbûrân Yunus ve Şaban Beşeler cihet-i havâle-i mezkûreden müteveffâ-i mezbûr el-Hâc İsmail Ağa’ya deynleri olan meblağ-ı merkūmdan her biri âharın hisselerine lâzım gelen meblağa kefîl ve zâmin olup meblağ-ı merkūm vech-i meşrûh üzere zimmetlerinde deynleri olduğunu müş‘ir karz unvânıyla işbu bir kıt‘a temessükü i‘tâ eylediklerinden sonra meblağ-ı merkūm üç bin altı yüz guruşun bin dört yüz guruşunu merkūm İslâm Beşe müteveffâ-i mezbûra ve gerek zevce-i menkûhası mezbûreye hayatında edâ ve teslîm ve temessük-ı mezkûr zahrına kaydolunup mâ‘adâsı olan iki bin iki yüz guruşu kable’l-ahz ve’l-istîfâ fevt ve meblağ-ı bâkī-i mezkûr veresesi mezbûrûna mevrûs olmağla meblağ-ı bâkī-i merkūm iki bin iki yüz guruşdan ber-mûceb-i tashîh-i mezkûr vasîsi olduğum oğlum sagīr-i mezbûr İbrahim Edhem’in hissesine isâbet eden yedi yüz yetmiş guruşu asâlet ve kefâlet-i mezkûresine binâen merkūm İslâm Beşe’den bi’l-vesâye hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu bi-tamâmihâ tâyi‘an ve kat‘iyyen ikrâr u i‘tirâf edip lâkin fırın-ı mezkûrda ekmekçi olduğum müddetde benim külliyetli zarar ve haserâtım olup fırın-ı mezkûru terk edip hâlâ mesdûd olmağla bundan böyle fırın-ı mezkûru esnâf ma‘rifetiyle her kime tahmîl olunup gedik-i mezkûru kim kabûl ederse deyn-i mezkûru dahi ol kimesneden taleb eylesinler ben vermem demesi meşrû‘ ve müvecceh olmamağla iltifât olunmayıp alâ-mûceb-i i‘tirâfihi meblağ-ı bâkī-i mezkûrdan sagīr-i mezbûr İbrahim Edhem’in hissesi olan meblağ-ı mezkûr yedi yüz yetmiş guruşu vâlidesi müdde‘iye-i vasî-i mezbûre diğer Zeliha Hatun’a asâlet ve kefâletine binâen edâsıyla merkūm İslâm Beşe ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-25 min Za sene [1]217