İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 531 Hüküm no: 624 Orijinal metin no: [94a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lago v. Nikola’nın, Sultan Abdülhamid Han vakfından icareli bir bab kasab dükkânı gediğinin yarım hissesini Margarit v. Dado’ya sattığı Kasab Ma‘rûz Hüdâvendigâr-ı sâbık cennet-mekân firdevs-âşiyân Sultan Abdülhamid Hân —aleyhi’r-rahmeti ve’l-Gufrân— hazretlerinin evkāf-ı şerîfeleri Yedikule kapısı hâricinde vâki‘ ganem selhhânelerinden onuncu selhhâneye merbût Tarabya’da ekmekçi fırını karşısında vâki‘ bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin nısfına vakf-ı müşârun-ileyh mütevellîsi temessüküyle mutasarrıf olan Lago v. Nikola zimmî meclis-i şer‘-i münîrde hâssa kasabbaşısı İzzetlü [94b] Mustafa Ağa tarafından mürsel kasablar kethüdâsı İsmail Ağa ve ustalarından Hâfız Ömer ve el-Hâc Ahmed ve Mehmed nâm kimesne hâzır oldukları hâlde kasab ustalığını idâreye kādir idüğü ihbâr olunan bâ‘isü’l-i‘lâm Margarit v. Dado zimmî muvâcehesinde takrîr-i kelâm edip âlât-ı lâzıme-i mezkûreden mutasarrıf olduğum nısf hisse-i şâyi‘amı hüsn-i rızâmla bedel-i ma‘lûm ve makbûz mukābelesinde bâ-re’y-i mütevellî mesfûr Margarit zimmîye ferağ-ı kat‘î-i mu‘teber ile ferağ ve tefvîz eylediğimde ol dahi tefevvüz ve kabûl edip ba‘de’l-yevm âlât-ı lâzıme-i merkūmenin nısfı mezfûr Margarit zimmînin hakk-ı müfevvezi olup kat‘an benim alâka ve medhalim kalmamamışdır dedikde ol dahi tasdîk etmeğin nısf-ı âlât-ı mezkûre fâriğ-i mersûmun ferağından mesfûr Margarit zimmî üzerine tahrîr ve defter-i vakf-ı şerîfe ba‘de’l-kayd yedine temessük i‘tâsını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-24 min Za sene [1]217