İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 532 Hüküm no: 626 Orijinal metin no: [94b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saka Veliyüddin Beşe’nin, İstanbul Kuruçeşme’deki saka gediğinin nısf hissesini kardeşi İmamoğlu Eyüb Beşe b. Yusuf’a teslim etmesi gerektiği At sakası gediği teslîmine tenbîh Ma‘rûz Fi’l-asl vilâyet-i Anadolu’da Eğin kazâsına tâbi‘ Ernik karyesinde sâkin İmâmoğlu Eyüb Beşe b. Yusuf nâm kimesnenin oğlu ve tarafından husûs-ı âtîde vekîl olduğu kazâ-i merkūm ahâlîsinden İvaz oğlu es-Seyyid Mustafa Beşe b. Ali ve Vebil oğlu Hüseyin b. Ali şehâdetleriyle sâbit olan Mehmed Emin nâm kimesne meclis-i şer‘-i münîrde saka bölükbaşısı Mahmud Beşe ve es-Seyyid Mustafa Beşe ve es-Seyyid Abdullah Beşe hâzır oldukları hâlde müvekkil-i mezbûrun karındaşı Saka Veliyüddin Beşe b. el-mezbûr Yusuf muvâcehesinde İstanbul’da Kuruçeşme’de vâki‘ at sakası gediği tâ‘bir olunur âlât-ı lâzımenin nısfı babam müvekkilem mezbûrun ve nısf-ı âharı karındaşı ammim merkūm Veliyüddin Beşe’nin iştirâken ve şâyi‘an yedlerinde mülkleri iken ammim mezbûr mârru’z--zikr at sakası gediği tâ‘bir olunan âlât-ı lâzımenin mecmû‘unu müstakilleten zabt etmekle nısfından keff-i yedine tenbîh olunmak bi’l-vekâle matlûbumdur deyü da‘vâ ettikde ol dahi cevâbında karındaşım müvekkil-i mezbûr Eyüb Beşe bin yüz doksan bir senesi Zilhicceti’ş-şerîfesinin on beşinci günü mutasarrıf olduğu nısf-ı âlât-ı mezkûreyi yedi yüz guruş semen-i makbûza bana bey‘ ve temlîk ve teslîm ben dahi iştirâ ve temellük ve kabûl etmemle ol vechile mülk-i müşterâm olmak üzere mecmû‘unu zabt ve vaz‘-ı yed ederim deyü eylediği def‘ine ikāmet-i beyyineden ızhâr-ı acz etmekle mevkūfen alâ yemîni’l-müvekkil nısf-ı âlât-ı mezkûreden kasr-ı yed ve müvekkil-i merkūm için oğlu vekîl-i müdde‘î-i mezbûr Mehmed Emin’e teslîm olunmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-13 min Za sene [1]217