İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 533 Hüküm no: 627 Orijinal metin no: [94b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Un kapanı kileciler kethüdalığına Seyyid Davud Beşe b. Mehmed’in tayini Kapan-ı dakīk kileci kethüdâlığı fermân istid‘âsı Ma‘rûz Âsitâne-i aliyye ve tevâbi‘i olan bilâd-ı selâsede vâki‘ habbâzân tâifesinin kethüdâları Mustafa Ağa ve uncular kethüdâsı es-Seyyid Mustafa Ağa ve bi’l-cümle nizâm ustaları ve kapan tüccârından el-Hâc Ömer ve kalafat İsmail ve el-Hâc Mehmed Emin ve Kebecizâde Mehmed Ârif ve Kırımlı el-Hâc İsmail ve el-Hâc Hâfız Ahmed ve sâir cerîdede mazbûtü’l-esâmî tüccâr meclis-i şer‘-i münîrde bu esnâda kileciler kethüdâsı ta‘yîn olunan bâ‘is-i i‘lâm es-Seyyid Davud Beşe b. Mehmed nâm kimesne muvâcehesinde her biri takrîr-i kelâm edip kapan-ı mezkûr iskelesine vürûd eden zehâiri sefînelerden ihrâc-ı vekîl eden kilecilerin mukaddemâ kethüdâsı olan Ebûbekir nâm kimesne kemâl-i mertebe müfsid ve hilekâr ve dâimâ şîrâze-i nizâm-ı kadîmimizin ihtilâline bâdi hâlâta ictisâr ve her birimizi gûnâ-gûn ızrâr ve bâ-husûs zehâiri vezn ve tekyîl esnâsında bi’d-defa‘ât hilesi âşikâr olmağla mezbûru cümle ma‘rifetiyle mukaddemâ tard ve ihrâc ve yerine istikāmetle mevsûf ve her vechile mücerrebü’l-etvâr ve cümlemizin marzî ve muhtârımız olan işbu mezbûr es-Seyyid Davud Beşe’yi talebimiz ile kıbel-i şer‘den kileciler kethüdâsı nasb ve ta‘yîn olunmuşdu lâkin kethüdâ-yı sâbık merkūm Ebûbekir bu esnâda ba‘zı mahallere istinâd ile yine kethüdâ olmak dâ‘îyesinde olmağla esnâfımızı sıyâneten ba‘de’l-yevm azl olunan merkūm Ebûbekir husûs-ı mezkûra kat‘an müdâhale ve ta‘arruz etmemek üzere fermân-ı âlîleri sudûrunu bi’l-ittifâk istid‘â ve istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî-14 min Za sene [1]217