İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 534 Hüküm no: 628 Orijinal metin no: [94b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Mehmed’in, İbrahim Paşa Cami-i şerifi vakfından icareli bir bab sepetçi gediğini Şerife Alime bt. Seyyid Mehmed’e kiraladığı Kurşunlu mahzende sepetçi gediği îcârı Ma‘rûz Sâhib-i arzuhâl Ahmed Ağa b. Mehmed nâm kimesne bi’l-ma‘iyye rü’yete me’mur Haremeyn-i şerîfeyn müfettişi müderrisîn-i kirâmdan Faziletlü Mehmed Atâullah Efendi tarafından mürsel Kâtib es-Seyyid Hüseyin Efendi b. Mustafa ile akd olunan meclis-i şer‘-i hatîrde derûn-ı arzuhâlde mezkûratü’l-ism mu‘arrefetü’z-zât Şerîfe Alime bt. es-Seyyid Mehmed nâm Hatun muvâcehesinde Âsitâne-i aliyye ve tevâbi‘i olan bilâd-ı selâsede vâki‘ sepetçi esnâfının kethüdâsı İsmail ve ustalarından Halil [95a] ve Mustafa ve İbrahim nâm kimesneler hâzır oldukları hâlde hâmiş-i arzuhâlde mastûr defter-i vakıfdan muhrec derkenâr nâtık olduğu üzere Bâbü’s-sa‘âdeti’ş-şerîfe ağası nezâretinde âsûde evkāfdan İstanbul’da Silivrikapısı dâhilinde merhûm İbrahim Paşa Câmi‘-i şerîfi evkāfı musakkafâtından Galata’da Kurşunlu mahzen dâhilinde vâki‘ bi’l-îcâreteyn mutasarrıf olduğum bir bâb sepetçi dükkânı şehriye yetmiş para kirâ ile mezbûre Şerîfe Alime Hatun’un müşâhereten taht-ı îcâresinde ve derûnunda mevcûde beyne’l-esnâf gedik tâ‘bir olunan âlât-ı lâzıme-i ma‘lûme bâ-hüccet mülkü olup dükkân-ı mezkûr gediği başmuhâsebede mukayyed olduğu üzere zikr olunan kurşunlu mahzen dâhilinde topdan mukayyed olan dört bâb sepetçi dükkânları gediklerinde dâhil ve mu‘teber gediklerden olduğu esnâf-ı merkūme kethüdâsı vesâir hâzirûn-ı merkūmûn ihbârlarıyla mütehakkık olup mezbûre Şerîfe Alime Hatun dükkân-ı mezkûru peştemallik tâ‘bir olunur îcâre-i ma‘lûme ile tarafından bir kimesneye îcâr ve iskân edip lâkin dükkân-ı mezkûrun bana lüzumu olmağla derûnunda olan âlât-ı lâzımeyi ihrâc eylesin deyü bundan akdem nizâ‘a tasaddî ve ol vechile beynimizde ba‘de’l-müşâcere beynimiz tevfîk ve ıslâh olunup ben dükkân-ı mezkûru şehriye îcâre-i kadîme-i mezkûresi olan yetmiş para üzerine otuz para zam ile ecr-i misline iblâğ olunup ol vechile târih-i i‘lâmdan beher şehr yüzer para icâre tesmiyesiyle mezbûre Şerîfe Alime Hatun’a îcâr eylediğimde ol dahi ber-vech-i muharrer istîcâr ve kabûl edip icâre-i mezkûresini cevr ve ezâ etmeksizin mâh be-mâh edâya müte‘ahhide olmağla ben dahi dükkân-ı mezkûr derûnunda mevcûde âlât-ı merkūme Şerîfe Alime Hatun’un mülkü olup ke’l-evvel gediği olmak üzere tasarrufuna izin ve icâzet verip kat‘-ı münâza‘a eyledik dedikde ol dahi tasdîk eylediği İstanbul mahkemesinde tescîl ve huzûr-ı âlîlerine i‘lâm olundu. Fî-26 min Za sene [1217]