İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 535 Hüküm no: 629 Orijinal metin no: [95a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kestestor v. Manas’ın Galatasaray çeşmesi sakalığından çıkarıldığı Galatasarayı çeşmesinden saka ihrâcı Ma‘rûz Galatasarayı pişgâhında vâki‘ su çeşmesi ve Beyoğlu nâm mahalde kâin çeşmelerin sakalar bölükbaşısı es-Seyyid Hüseyin ve sakalarından diğer es-Seyyid Hüseyin ve es-Seyyid Halil ve es-Seyyid Bayram ve es-Seyyid Abdullah ve es-Seyyid Musa nâm kimesneler ile Oskehan ve Kalok ve Manas ve Davit ve Yanos ve Tomas vesâirleri otuz neferden mütecâviz sakayân tâifesi meclis-i şer‘-i hatîrde Kestestor v. Manas zimmî muvâcehesinde mârru’z--zikr Sarayönü çeşmesinin arka sakası kendine şirâen mâlik olan Marat v. Artin zimmî hâzır olduğu hâlde mesfûr Kestestor zimmî hâzır-ı mersûm Marat zimmînin gediği olan su çeşmesinde peştemallik tâ‘bir olunan icâre ile sakalık edip lâkin kendi halinde ırzıyla mukayyed ve kesbiyle meşgūl olmayıp ve lede’l-hâce hizmet-i me’mûremiz olan mahalde bulunmayıp beynimizde câri nizâmımız ihtilâline bâ‘is ve müşâcere ve mücâdeleye bâdi ve beynimizde ilkā-i fesâda sebeb olup bi’d-defa‘ât kendiye nush u pend olundukda kat‘an mütenebbih olmayıp ızrârından ısrâr üzere olmağla mesfûr Kestestor zimmîden emn ve rahatımız bi’l-külliye meslûb olmuşdur deyü iştikâ ve mesfûrun türlü türlü harekât-ı nâ-marziyyeye ictisârını ve sû-i hâlini muvâcehesinde ihbâr ve fîmâ ba‘d içimize duhûl etmeyip âhar mahalde kâr u kesbe meşrû‘ etmek üzere zimmî-i mesfûrun tâife-i merkūmeden ihrâc olunmasını bi’l-ittifâk istid‘â ve istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî-27 min Za sene [1]217