İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 535 Hüküm no: 630 Orijinal metin no: [95a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Topcularlı Mehmed Ağa b. Abdullah’ın, İstanbul ırgatpazarındaki değirmen gediğinin yarısını Mehmed b. Ali’ye diğer yarsını da İbrahim Ağa b. Halil’e sattığı Irgād pazarında değirmen gediği mübâya‘ası ve âhar mahalle nakil Ma‘rûz İstanbul’da ırgatpazarı nâm mahalde vâki‘ bayatyeri değirmeni demekle ma‘rûf sekiz sehm i‘tibâr olunan iki horoslu uncu değirmeni gediği tâ‘bir olunan sekiz re’s bârgir âlât-ı lâzımeye ale’l-iştirâki’s-seviyy mâlikleri olup kendi nefsinden asîl ve yeğeni es-Seyyid Ebûbekir b. es-Seyyid İbrahim tarafından husûs-ı âtîde vekîl olduğu Topcularlı Mehmed Ağa b. Abdullah ve es-Seyyid Mustafa Ağa b. Mehmed Emin şehâdetleriyle sâbit olan es-Seyyid el-Hâc Ali b. Mustafa meclis-i şer‘-i münîrde Âsitâne-i aliyyede vâki‘ habbâzân esnâfının kethüdâsı Mustafa Ağa ve uncular kethüdâsı es-Seyyid Mustafa ve nizâm ustaları hâzır oldukları hâlde İstanbul’da Zeyrek kurbünde asmalı değirmen demekle ma‘rûf üç horoslu uncu değirmeni gediği tâ‘bir olunan on iki re’s bârgir ve ona tâbi‘ olan sâir âlât-ı lâzıme-i ma‘lûmeye kezâlik ale’l-iştirâki’s-seviyy mâlikler olup kendiden asîl ve şerîki Mehmed b. Ali tarafından zikri âtî husûsu tasdîka vekîl-i şer‘îsi İbrahim Ağa b. Halil muvâcehesinde müvekkilim yeğenim mezbûr es-Seyyid Ebûbekir ile ale’l-iştirâki’s-seviyy yedimizde mülkümüz olan sâlifü’z-zikr bayatyeri değirmeni demekle ma‘rûf iki horoslu bir kıt‘a uncu değirmeni gediği tâ‘bir olunan sekiz re’s bârgir ve ona tâbi‘ olan sâir âlât-ı lâzıme-i ma‘lûmenin altı re’s bârgir ile âlât-ı lâzımesinden hisse-i ma‘lûmeyi bi-safkatin vâhidetin altı yüz guruşa mezbûr İbrahim Ağa’ya ve mâ‘adâ iki re’s bârgir ile sâir âlât-ı lâzımeden hisse-i ma‘lûmeyi dahi kezâlik bi-safkatin vâhidtine iki yüz guruşa müvekkil-i mezbûr Mehmed’e tarefeynden îcâb ve kabûlü hâvi şürût-ı müfside ve muvâza‘adan âri bey-i bâtt-ı sahîh-i şer‘î ile vech-i meşrûh üzere cem‘an sekiz yüz guruşa bi’l-asâle ve bi’l-vekâle bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabûl eylediklerinden sonra semeni olan meblağ-ı mecmû‘-ı mezkûr sekiz yüz guruşu müşteriyân-ı mezbûrân yedlerinden bi’l-asâle ve bi’l-vekâle tamamen ve kâmilen ahz u kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘avîden müşteriyân-ı mezbûrânın zimmetlerini kabûllerini hâvi ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve iskāt eyledim dedikde mezbûr İbrahim Ağa dahi ba‘de’t-tasdîk sâlifü’z-zikr bayatyeri değirmeni bu esnâda vukū‘ bulan harîkde muhterik olup arsa-yı hâliye kalmağla mülk sâhibi olan kimesnenin iktidârı olmadığına binâen ve binâdan ibâ vü imtinâ‘ etmekle değirmen-i mezkûrun arsasına fîmâ ba‘d değirmen ihdâs olunmayıp âhar akara tebdîl olunmak üzere mârrü’l-beyân uncu gediği tâ‘bir olunan iki horoslu sekiz re’s bârgirden ibâret olan âlât-ı lâzıme-i ma‘lûmeyi zikr olunan asmalı değirmenine naklolunmasını istirhâm ve vech-i meşrûh üzere naklolunmakda kimesneye zararı olmayıp nakli şürûtlarından olduğunu hâzirûn-ı mezbûrûn habbâzân kethüdâsı ve uncular kethüdâsı ve nizâm ustaları ihbâr etmeleriyle vech-i meşrûh üzere nakli bâbında izn-i âlileri erzânî buyrulup zikr olunan asmalı değirmeni cem‘an beş horos olarak yirmi re’s bârgir [95b] ona tâbi‘ olan âlât-ı lâzıme-i ma‘lûmenin yirmi sehm i‘tibâriyle on iki sehmi mezbûr İbrahim Ağa üzerine ve sekiz sehmi müvekkil-i mezbûr Mehmed’in üzerine olmak üzere başmuhâsebe kalemine kayd ve zabt ve tasarrufları için yedlerine sûret i‘tâ olunmak bâbında istid‘â-yı inâyet eyledikleri İstanbul Mahkemesi’nden huzûr-ı âlîlerine i‘lâm olundu. Fî-14 min Za sene [1]217