İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 549 Hüküm no: 644 Orijinal metin no: [98a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid İsmail b. Mehmed’in, Mehmed Emin b. Mahmud aleyhine açtığı Sorguççubaşı gediği davasında iddiasını ispat edemediğinden muarazadan men edildiği Sorguççubaşı gediği mu‘ârazadan men‘ Ma‘rûz Mübârek rikāb-ı kamer-tâb-ı hüsrevâneye arzuhâl eden sorguççubaşı hâssa sâhib-i arzuhâl es-Seyyid İsmail b. es-Seyyid Mehmed Çarşamba günü arz odasında huzûr-ı âsafîde ma‘kūd meclis-i şer‘de sâbıkā sorguççubaşı müteveffâ Ahmed’in li-ebeveyn karındaşı Mehmed Emin b. Mahmud mahzarında zikri âtî dükkânının bi’l-îcâreteyn mutasarrıfı bezzâzistânî Ali b. Hasan hâzır olduğu hâlde İstanbul’da Sorguççular Hânı civârında baratacı dükkânına muttasıl bir bâb sorguççu dükkânında ötedenberü sorguççubaşı hâssa olanlar bilâ gedik sâkin olagelip selefim fevt ve sorguççubaşılık bana tevcîh olunduğuna binâen dükkân-ı mezkûrda ber-mûceb-i âdet-i kadîme ben sâkin olmak iktizâ eder iken müteveffâ-i merkūmun karındaşı işbu mezbûr Mehmed Emin mugāyir-i kā‘ide-i kadîme fuzûlî zabt ve sâkin olmağla dükkân-ı merkūmu tahliyye ve bana teslîme mezbûr Mehmed Emin’e tenbîh olunmak murâdımdır deyü da‘vâ ettikde ol dahi cevâbında dükkân-ı merkūm derûnunda mevcûde âlât-ı lâzıme karındaşım müteveffâ-i mezbûrun irsen ve şirâen yedinde mülkü iken fevt oldukda irsen ve müşteriklerimden şirâen bâ-hücec-i şer‘iyye yedimde müstakillen mülküm olup dükkân-ı mezkûr şehriye dokuz guruş kirâ ile mutasarrıfı hâzır-ı mezbûr tarafından gedik olmak üzere izin ve icâzet verilerek taht-ı îcâremdedir deyü mutasarrıfı hâzır-ı merkūm Ali Ağa’nın tasdîkiyle ber-vech-i meşrûh sorguççubaşılara mahsûs olduğu ma‘lûmumuz değildir deyip hakīkat-i hâl bî-garaz ehl-i vukūfdan istihbâr ve kadîmden beri dükkân-ı merkūm sorguççubaşılara mahsûs mudur değil midir tefahhus ve tahkīk olunmak üzere tarefeynin istidalarına mebni lisânen sâdır olan fermân-ı âlîlerine imtisâlen savb-ı şer‘den mürsel kâtib-i sâni Merhabâzâde Mahmud Efendi’nin dükkân-ı merkūm derûnunda akd eylediği meclis-i şer‘-i münîrde dükkân-ı merkūm kadîmden beri sorguççubaşılara mahsûs olmayıp müteveffâ-i merkūmun yedinde mülkü olduğunu ve müteveffâ-i merkūmdan mukaddem eslâfı sorguççubaşılar her biri âhar dükkânlarda gedik iştirâ ve sâkin olduklarını ve müdde‘î-i merkūmun vech-i meşrûh üzere müdâhalesi bî-vech olduğunu kurb ve civârında vâki‘ vukūf-ı tammı olan kimesnelerden sorguççu Ali Ağa ve es-Seyyid el-Hâc Mehmed Emin ve Mûytâb es-Seyyid Hâfız Ali ve Mûytâb es-Seyyid Ahmed ve İsmail ve Süleyman ve diğer Ahmed ve Yağlıkçı Hâfız Ahmed ve Yağlıkçı es-Seyyid Mehmed Emin ve hân-ı mezkûr sükkânından el-Hâc Salih Ağa ve Bezzâzistânî Ali ve Basmacı el-Hâc Mustafa ve Dellâl el-Hâc Abdurrahim vesâir cerîdede mazbûtü’l-esâmî cemm-i gafîr Müslimîn alâ-tarîkı’ş-şehâde ihbâr eyledikleri kâtib-i merkūm mahallinde tahrîr ve ma‘an mürsel ümenâ-i şer‘le [98b] tarefeyn muvâcehelerinde meclis-i şer‘de inhâ etmeğin mûcebince gedik-i mezkûr merkūm Mehmed Emin’in yedinde mülkü olduğu mütehakkık ve sorguççubaşı merkūmun ta‘arruzu bî-vech olmağla mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-4 min-Zilhicce sene [1]217