İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 553 Hüküm no: 647 Orijinal metin no: [99a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuzcu Mehmed b. Şaban’ın, alacak davasında Mehmed Emin-Beyefendi b. Mahmud Bey ile bedel-i sulh karşılığında anlaştığı 1.500 guruşdan 660 guruşa sulh Ma‘rûz Derûn-ı arzuhâlde mezkûrü’l-ism Tuzcu Mehmed b. Şaban bi’t-terâzi meclis-i şer‘-i münîrde sâhib-i arzuhâl hâcegân-ı dîvân-ı hümâyûn hâlâ Emin-i giyâh es-Seyyid Mehmed Emin-Beyefendi b. es-Seyyid Mahmud Bey mahzarında mûmâ-ileyh es-Seyyid Mehmed Emin-Beyefendi ber-vech-i mâlikâne mutasarrıf olduğu yörükân-ı aded-i ağnâm Kastamonu mukāta‘asını bin iki yüz sekiz senesi Martından bir sene-i kâmile zabt etmek üzere gāib ani’l-meclis Haseki Ali Ağa b. ( ) nâm kimesneye iki bin altı yüz guruşa ilzâm ve bedel-i iltizâm-ı mezkûrun bin yüz guruşunu ber-vech-i peşin kabz etmekle mâ‘adâsı olan bin sekiz yüz guruş için mültezim-i gāib-i mezbûrun nefsine kefîl olduğuma binâen meblağ-ı bâkī-i merkūm bin beş yüz guruşu târih-i mezbûrdan altmış bir gün mürûrunda mûmâ-ileyh Mehmed Emin-Beyefendi mültezim-i gāib-i merkūmun kefîlisin deyü benden bi-gayr-ı hakkın ahz edip lâkin meblağ-ı merkūm bedel-i iltizâm olup düyûn-ı sahîhden olmamağla kefâlet-i mezkûre dahi şer‘an sahîha olmadığına binâen me’hûzu olan meblağ-ı merkūm bin beş yüz guruşu mîr-i mûmâ-ileyhden istirdâd ederim deyü tasaddî eylediğim da‘vâ-yı mezkûremden bâ-tavassut-ı muslihîn bi’t-tav‘ ve’r-rızâ altı yüz altmış guruşa mîr-i mûmâ-ileyh ile ba‘de akdi’l-musâlahati ve’l-kabûl bedel-i sulh-i mezkûrdan mâ‘adâ bin beş yüz guruşa varınca ziyâde olan sekiz yüz kırk guruşa müte‘allika âmme-i de‘avîden mîr-i mûmâ-ileyhin zimmetini kabûlü hâvi ibrâ ve iskāt eyledim deyü mukırr-ı merkūm Tuzcu Mehmed’in takrîr-i meşrûhunu mîr-i mûmâ-ileyh tasdîk ve sâlifü’l-beyân ibrâdan müstesnâ bedel-i sulh-i merkūm altı yüz altmış guruş zimmetinde müdde‘î-i merkūma sahîhan deyni olduğunu bi-tamâmihî tâyi‘an ve kat‘iyyen ikrâr u i‘tirâf etmeğin alâ-mûceb-i i‘tirâfıhi meblağ-ı merkūm altı yüz altmış guruşun müdde‘î-i merkūma bi’t-taleb edâsıyla mûmâ-ileyh es-Seyyid Mehmed Emin-Beyefendi ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî-27 Za sene [1]217