İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 554 Hüküm no: 648 Orijinal metin no: [99a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ali’nin, İstanbul Zindankapısı hâricindeki tuzcu dükkânı gediğini vekâleten satan Ali Usta b. Osman’ın zimmetini ibrâ ettiği Tuzcu gediği vekâletiyle bey‘ ve ibrâ Ma‘rûz Tuzcu esnâfından es-Seyyid Mehmed b. es-Seyyid Ali meclis-i şer‘-i münîrde yine esnâf-ı merkūmeden Ali Usta b. Osman mahzarında târih-i i‘lâmdan iki sene mukaddem İstanbul’da Zindânkapısı hâricinde tuzcular sûkunda kâin Hacı Molla dükkânı demekle ma‘lûm bir bâb tuzcu dükkânı derûnunda mevcûde müstakillen yedimde mülküm olan beyne’l-hıref gedik tâ‘bir olunur âlât-ı lâzıme-i ma‘lûmemi semen-i misliyle âhara bey‘a ve kabz-ı semene ve semeninden bâ-defter-i müfredât ma‘lûmü’l-esâmî kimesnelere olan düyûnumu edâya ve fazla kalır ise bana teslîme bundan akdem tarafımdan mezbûr Ali Usta’yı tevkîl etmemle ol dahi ba‘de kabûli’l-vekâle gedik tâ‘bir olunur âlât-ı mezkûreyi ol târihde semen-i misli olan iki bin yüz elli guruşa Kara Ahmed nâm kimesneye bi’l-vekâle bey‘ ve teslîm ve semeni olan meblağ-ı mezkûr iki bin yüz elli guruşu kabz ve dâyînlerime tevzî‘ ve taksîm-birle düyûnumu îfâ edip ol vechile gedik-i mezkûrda benim kat‘an alâka ve medhalim kalmayıp semeni olan meblağ-ı mezkûrdan dahi vekîlim [99b] mezbûrun yed ve zimmetinde bir akçe ve bir habbe bâkī hakkım kalmamağla bi’l-cümle zikr olunan husûsla müte‘allika âmme-i de‘avîden mezbûr Ali Usta’nın zimmetini kabûlü hâvi ibrâ ve iskāt eyledim deyü ikrâr ve tasdîkleri İstanbul mahkemesinde tescîl ve huzûr-ı âlîlerine i‘lâm olundu. Fî-19 Za sene [1]217