İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 554 Hüküm no: 649 Orijinal metin no: [99b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadeddin Efendi mescid-i şerifi vakfı mütevellîsi Şeyh Ahmed Nâsır Efendi’nin, mescitte yaptığı ilave eklemeri kaldırılarak yapıyı orijinal haline getirmesi gerektiği Keşif Ma‘rûz Sâdır olan fermân-ı âlîlerine imtisâlen kıbel-i şer‘den mürsel kâtib-i sâni Merhabâzâde Mahmud Efendi İstanbul’da Dıraman kurbünde Hammâmî Muhyiddin Mahallesi’nde vâki‘ nezâret-i dâ‘îlerinde âsûde evkāfdan merhûm Sadeddin Efendi mescid-i şerîfine varıp huzûr-ı Müslimînde akd-i meclis-i şer‘-i kavîm ettikde sâhib-i arzuhâl Tersâne-i âmire kereste kâtibi Mustafa Ârif Efendi b. Salih tarafından vekîl olduğu Mustafa b. Abdüllatif ve el-Hâc Ahmed b. el-Hâc Hasan şehâdetleriyle zâhir olan Molla Abdülkādir b. Yusuf ile Mehmed Efendi b. Mehmed ve es-Seyyid Ali b. Eyüb ve el-Hâc Ahmed b. el-Hâc Hasan ve es-Seyyid Hasan vesâirleri meclis-i ma‘kūd-ı mezkûrda vakf-ı mezbûrun mütevellîsi Şeyh Ahmed Nâsır Efendi b. el-Hâc Mehmed mahzarında mezbûr Şeyh Ahmed Nâsır Efendi mescid-i şerîf-i mezkûrun son cema‘at mahallinin etrâfına doğrama zâr vaz‘ıyla setr ve mahâll-i mezbûru kahve odası ittihâz ettiğinden mâ‘adâ mescid-i şerîf-i mezkûrun taşra kapısı kadîmden kesmekaya tarafına mürûr eden tarîk-i âmda iken bu esnâda sâlifü’z-zikr kapıyı sedd u bend ve Balat tarafına mürûr eden tarîk-i âm tarafından müceddeden kapı küşâdına binâen mescid-i mezbûrun fi’l-asl mekābir-i Müslimîn olan mahalli şak ve türâbını ihrâc ile tarîk-i mârre edip muhdes kaldırım vaz‘ etmekle ba‘de’l-mu‘âyene son cema‘at mahallinin zârı ref‘ ve ihdâs eylediği mekābir-i Müsliminden mürûr eden kapıyı sedd u bend ve muhdes kaldırım dahi ref‘ ve meşkûk olan mahallin türâbını ilkā ile tesviye olunmak matlûbumdur dediklerinde Mevlânâ-yı mezbûr mahallinde ba‘de’l-mu‘âyene mezbûrûn ile ma‘an meclis-i şer‘de gelip muvâcehelerinde alâ-vukū‘ihî inhâ ve takrîr eylediğinde zikr olunan muhdes kapıyı sedd u bend ve muhdes kaldırımı dahi ref‘ ve meşkûk olan mahallin türâbını ilkā ile tesviye ve kadîmi olan kesmekaya tarafına mürûr eden tarîk-i âmda olan kapıyı küşâd ve son cema‘at mahallinin etrâfına ihdâs eylediği doğrama zârı ref‘e mütevellî-i mezbûr eş-Şeyh Ahmed Nâsır Efendi’ye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-5 Z sene [1]217