İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 558 Hüküm no: 651 Orijinal metin no: [100a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yenibahçe kolu bahçıvânları’nın, Tersâne-i Âmire’ye verilecek bahçıvân amelesi ücretleri için anlaştıkları Yenibahçe kolu bahçıvânlarının teklîf Tersâne-i Âmire’ye dâir i‘lâm Ma‘rûz İstanbul’da Yenibahçe kolu tâ‘bir olunan bahçıvân tâifesinin yiğitbaşısı Taso ve ustalarından Çomil ve Kosta ve Lazo ve Hristo ve Angeli ve Kalib ve diğer Kosta ve Aleksi ve Petro ve Tanaş ve Dilo ve Yorgi ve Abraham vesâir cerîdede mazbûtü’l-esâmî zimmîler meclis-i şer‘-i münîrde bahçıvânlar kethüdâsı İsmail Ağa tarafından mürsel vekîli oğlu Ahmed Haseki ile Yedikule kolu bahçıvânlarının yiğitbaşısı Zanya ve ustalarından Angeli ve Pireşkova ve Büyüklankalı Yoto ve Tapako ve Küçüklankalı Yorgi ve Topal ve Timur ve Kasımpaşalı Yorgi ve Balat’ta Çukur nâm mahalde Marko ve Estiko ve Simyon ve Yedikule hâricinde kâin bahçıvânlardan Tiko ve Kadırgalimanı bahçıvânlarından Kosta ve Sulukule bahçıvânlarından Kasko ve Yano nâm zimmîler hâzır oldukları hâlde yine zikr olunan Yenibahçe kolu bahçıvânlarından Mihâlâki ve Yorgi ve Anton ve Hristo ve diğer Yorgi ve Dimitri ve âhar Yorgi ve Kosta vesâir mazbûtü’l-esâmî zimmîler muvâcehelerinde bâ-evâmir-i aliyye Tersâne-i Âmire’de istihdâm için bahçıvân tâifesinden müretteb olan beher yevm üç yüz nefer ameleden sâlifü’z-zikr yeni bahçe koluna isâbet [100b] eden on iki nefer için gayr-ez ücret-i mîrî veregeldiğimiz beher şehr yüz doksan guruşu bahçelerimizin ma‘mûriyetine nazaran ve mülklerimiz olan gediklerimizin kıymetlerine göre beynimizde ta‘dîl ve tesviye-i şürûtuna ri‘âyet olunarak vech-i lâyıkı üzere tarh ve tahmîl olunmak iktizâ eylediğine binâen bahçıvânlar ustaları hâzirûn-ı mesfûrûn ma‘an her biri mahallinde mu‘âyene olundukda mârru’z--zikr Yenibahçe kolu otuz iki kıt‘a bahçelerden ibâret olup mezkûr bahçelerden Hacı İlyas ve Mimar Geyvan ve Cani bostanları demekle ma‘lûm nâm dört kıt‘a bostanlar gāyet a‘lâ ve ma‘mûr olmağla her birine on beşer guruşdan cem‘an altmış guruş ve Dede ve Anton ve Yamandi ve Yorgi nâm dört kıt‘a bostanlar a‘lâ olmağla her birine on ikişer guruşdan cem‘an kırk sekiz guruş ve simkeş bostanına dokuz guruş ve Sakola ve Tanaş nâm iki kıt‘a bostanlar vasat olmağla her birine yedişer guruşdan on dört guruş ve talimhâne ve Koto ve Taso ve Acı Pavli nâm dört kıt‘a bostanlar evsat olmağla her birine altışar guruşdan yirmi dört guruş ve Mezile ve Aleksi ve Cano ve Heyto nâm dört kıt‘a bostanlar ednâ olmağla her birine üçer guruşdan on iki guruş ve Tanaş ve Lomin ve Karaköykapısı ve Raço ve Yoko ve Sakızlı nâm altı kıt‘a bostanlar gāyet ednâ olmağla her birine seksen yedişer paradan on üç guruş ve perâkende tâ‘bir olunur gāyetü’l-gâye on yedi kıt‘a bostanların gedik ashâbına cem‘an on guruş tarh ve tahmîl olunduğu sûretde ta‘dîl ve tesviye-i şürûtuna ri‘âyet olunmuş olduğu hâzirûn-ı mesfûrûn bahçıvân ustaları ihbârlarıyla zâhir ve nümâyân olmağla sâlifü’l-beyân tahsîn-i emlâk zımnında nâzile olan tekâlif-i mezkûre için mâh be-mâh veregeldiğimiz meblağ-ı merkūm yüz doksan guruşu vech-i meşrûh üzere beynimizde tarh ve tahmîl ve tevzî‘ u taksîm olunmasına cümlemiz bi’l-ittifâk râzılar olup kat‘-ı münâza‘a eyledik dediklerinde onlar dahi tasdîk eyledikleri İstanbul Mahkemesi’nde tescîl ve huzûr-ı âlîlerine i‘lâm olundu. Fî-7 min-Zilhicce sene [1]217