İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 74 Hüküm no: 11 Orijinal metin no: [1b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa Beşe’nin, Yedikule, Tophane ve Eyüb Debbağlar kethudaları aleyhindeki davasında anlaşma sağlanması Debbâğ esnâfına dâir. Ma‘rûz Mübârek Rikâb-ı kamer-tâb-ı hüsrevânîye takdîm-i arzuhâl eden Musa Beşe b. Mehmed bi’l-ma‘iye rü’yete memûr Haremeyn-i şerîfeyn Müfettişi müderrisîn-i kirâm-ı zevi’l-ihtirâmdan fazîletlü el-Hâc Mehmed Fikri Efendi tarafından mürsel Kâtib Mehmed Efendi ile akd olunan meclis-i şer‘-i enverde Yedikule ve Tophâne ve Eyüb debbâğlarının kethudâları Süleyman Ağa ve Mustafa Ağa ve diğer Süleyman Ağa ve esnâfından ma‘lûmü’l-esâmî kimesneler muvâcehelerinde ben tüccârdan olmamla taşra memâlikinden mübâya‘a eylediğim dört yüz yetmiş beş aded keçi derileri işbu târihden üç sene mukaddem Uzunçarşı’da vaz‘ eylediğim kundakçı dükkânından esnâf-ı mezbûra şurûtları üzere bi-gayrı hakkın fuzûlî ahz ü kabz ve istihlâk etmeleriyle kıymetleri olan bin yüz seksen yedi buçuk guruşa mezbûrûndan tazmînini taleb ederim deyü da‘vâ eylediğimde onlar dahi şurûtları üzere benim tedîbimi iltimâs etmeleriyle beynimizde ba‘de’l-münâza‘a bâ-vesâtet-i muslihîn ben ber-vech-i muharrer tasaddî eylediğim da‘vâmdan mezbûrûn ile kat‘a li’n-nizâ‘ yetmiş guruş bedel-i makbûza bi’t-terâzî ba‘de’s-sulh ve’l-kabûl ziyâde müdde‘âma ve sâire müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt edip ve fîmâ-ba‘d hilâf-ı şurût hareket etmemeğe ta‘ahhüd eylediğimde onlar dahi şikâyetlerini terk ve tehîr etmeleriyle bu vechile kat‘-ı nizâ‘ eyledik deyü ikrâr ve tasdîkleri İstanbul Mahkemesi’nden huzûr-ı [âlîlerine i‘lâm olundu.] Fî 7 Ş sene 1222.