İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 75 Hüküm no: 12 Orijinal metin no: [1b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tahire’nin, babası Mehmed Emin aleyhindeki eşya ve alacak davasında anlaşma sağlanması 25 guruşa sulh mâ‘adâdan ibrâ, Ma‘rûz Mübârek rikâb-ı kamer-tâb-ı hüsrevânîye takdîm-i arzuhâl eden zâtı mu‘arrefe Tâhire bt. Mehmed Emin nâm hatun bi’d-defa‘ât Çarşamba günü Arz Odası’nda huzûr-ı hazret-i kāimmakām-ı âlî-makāmda ve ba‘dehû bi’t-terâzî du‘âhânemizde ma‘kūd meclis-i şer‘-i enverde derûn-ı arzuhâlde mezkûrü’l-ism mi‘mâr-ı hâssa hulefâsından babası Mehmed Emin Ağa b. Ali mahzarında hâlâ zevc-i dâhili Halil Beşe hâzır olduğu hâlde benim bundan akdem zevc-i dâhilim olup bâyinen tatlîk eden gāib ani’l-meclis Balıkesirî Alaybeyisi Kürtoğlu Osman Bey zimmetinde mütekarrir mehr-i müeccelim ve nafaka-i iddetim cem‘an beş yüz guruşa bundan akdem babam mezbûr tarafımdan vekâleten gāib-i mezbûrdan kabz edip [2a] zimmetinde kalmağla meblağ-ı mezkûr ile babam mezbûr beni menzilinden tard eylediğinden malım olup babam mezbûrun menzilinde kalan mecmû‘u dört bin üç yüz on beş guruş kıymetli altı çift baş çatması yasdık ve üç çuka mak‘ad ve iki koltuk yasdığı ve iki yemeni yüz yasdığı ve yün memlû üç minder ve şal evrengi? ve bir orta kîçesi ve bir kılâbdânlı kapı perdesi ve bir seccâde ve bir kilim ve dört sahan ma‘a kapak ve bir tas ve bir tepsi ve iki kadayıf tepsisi ve iki çift leğen ma‘a ibrik ve bir zenne koyun sâ‘ati ve bir mangal ma‘a tahta ve biri şal ve biri pullu ve biri canfes ve biri penbe gezi dört entari ve bir kat câmeşûy ve kılâbdânlı neftî ve mor altı top damgahâne? ve iki entarilik sûzenî ve bir ağabânî ve iki şal boğça ve hamam takımı ve evânî-i sîm ve bir çift elmas başlı bilezik ve bir havlu ve bir kavuk örtüsü ve bir makreme ve biri üstûfe ve biri Kıbrıs basması yorgan ve altı döşek, dört çârşeb ve iki baş yasdığı ve iki şilte ve on fincan ma‘a zarf ve bir kutu ve bir tepsimi dahi vermemekle eşyâ-yı mezkûre mevcûd ise a‘yânını müstehleke ise ba‘de’s-sübût kıymet-i şer‘iyelerini babam mezbûrdan hâlâ taleb ederim deyü ba‘de’d-da‘vâ ve’s-suâl mezbûr Mehmed Emin Ağa cevâbında ancak mehir ve nafaka beş yüz guruşa vekâleten kabzını ikrâr, lâkin kendüye tamamen def‘ ü teslîm etmiş idim deyü def‘ini ve mâ‘adâ müdde‘âsını tarafeynden her biri inkâr, her biri da‘vâ ve def‘ini beyâna ba‘de’l-havâle mezbûre Tâhire ben ber-vech-i muharrer tasaddî eylediğim da‘vâmdan bâ-tavassut-ı muslihîn babam mezbûr ile an-inkârin kat‘a li’n-nizâ‘ iki yüz elli guruş bedel-i makbûza bi’t-terâzî ba‘de’s-sulh ve’l-kabûl ziyâde müdde‘âma ve eşyâ-yı muharrere-i mezkûreye ve işbu târihe gelince sâir beynimizde cârî bi’l-cümle hukūk-ı şer‘iye-i ma‘lûme ve mechûleye, ol dahi bedel-i sulh-ı mezkûra ve def‘-i mezkûruna ve sâire müte‘allika da‘vâdan tarafeynden her birimiz âharın zimmetini ibrâ-yı âmm-ı sahîh-i şer‘î ile ibrâ ve iskāt ve tarafeynden her birimiz ber-vech-i muharrer âharın ibrâsını kabûl ile külliyen kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu.] Fî-gurreti Şa‘bân sene 1222.