İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 76 Hüküm no: 13 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gizlice francala ekmeği imal eden ve satan Vartan v. Kalos’un cezalandırılması talebi Hufyeten francala bey‘ olunmaması için bey‘den men‘ Ma‘rûz Âsitâne-i aliyye’de vâki‘ Habbâzân esnâfının kethudâsı Mustafa Ağa ve Nizâm ustalarından es-Seyyid İsmail Ağa ve es-Seyyid Hafız Ağa ve Ömer ve Hacı Hasan ve Nazım ve Fazlı ile re‘âyâ ustalarından Haçok ve Agob ve Agik ve Mandik ve Bogos ve Papa Can ve francalacı tâifesinden Kasbar ve Panayot ve Yani ve Kalos ve Nikola ve Minas ve Vartan ve sâir Müslim ve zimmîler meclis-i şer‘-i münîrde Vartan v. Kalos zimmî muvâcehesinde mersûm Vartan zimmî hırfetimizden olmayıp köşe ve bucaklarda hufyeten francala i‘mâl ve nâkısu’l-vezn olarak ibâdullâha fürûhta ictisâr ve cümle nizâm-ı kadîmimizin mugāyiri harekât-ı nâ-bercâya ibtidâr ve esnâfımız beyninde cârî ve mu‘teber ve düstûrü’l-amel olan şurût-ı nizâmımızın dürlü dürlü fesâdı mûcib hâlât-ı reddiyeye ictisâr ve şirâze-i nizâmımızın ihtilâline bâdî olduğu âşikâr olmağla zimmî-yi mesfûrun bu makūle ihtilâl-i nizâm-ı kadîmi mûcib harekât-ı nâ-marzıyesinden cümlemizin emn ü rahatımız meslûb olmağla mersûma defa‘âtle tenbîh olundukda bir vechile mütenebbih olmamakla mersûmdan vücûhla râzı değilleriz deyü sû-i hâlinden bahisle iştikâ ve vaz‘-ı kürek olunmasını iltimâs eyledikleri İstanbul Mahkemesi’nden huzûr-ı [âlîlerine i‘lâm olundu.] Fî 13 Ş sene 1222.