İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 77 Hüküm no: 14 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdullah’ın satın aldığı keresteci dükkânı gediğini teslim etmesi hususunda Kömürcü Seyyid Ebubekir’e tenbihte bulunulması Keresteci gediği isbâtı Ma‘rûz Sâhib-i arzuhâl es-Seyyid Abdullah b. es-Seyyid İsmail meclis-i şer‘-i münîrde derûn-ı arzuhâlde mezkûrü’l-ism Kömürcü es-Seyyid Ebûbekir b. Ahmed mahzarında mahrûse-i Galata’ya muzâfe Tophâne kapısında vâki‘ bir bâb keresteci dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme müstakıllen yedimde mülküm iken bin iki yüz yirmi bir senesi Muharremi’l-harâmı’nın yirminci günü gedik ta‘bîr olunur âlât-ı lâzıme-i ma‘lûmenin nısfını yedimde ibkā ve rub‘unu mezbûr es-Seyyid Ebûbekir’e ve rub‘-ı âharını diğer Ebûbekir nâm kimesnelere iki bin yüz guruş semen-i medfû‘ ve makbûza bey‘ ve teslîm etdikden sonra mezbûr Kömürcü es-Seyyid Ebûbekir rub‘ hissesini sene-i mezbûre Rebî‘ülevveli’nin beşinci günü bin iki yüz guruşa bana bey‘ ü temlik ve teslîm ben dahi ber-vech-i muharrer iştirâ ve temellük ve tesellüm etmiş iken mezbûr Kömürcü es-Seyyid Ebûbekir rub‘ hisse âlât-ı mezkûreyi fuzûlî zabt etmekle keff-i yedine tenbîh olunmak matlûbumdur deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını udûlden Keresteciler kethudâsı Mehmed Ağa b. Veliyüddin ve Yazıcı Molla Mustafa b. Osman şehâdetleriyle muvâcehesinde vech-i şer‘î üzere isbât etmeğin mûcebince mârrü’z-zikr rub‘ hisse âlât-ı lâzıme-i ma‘lûmeden keff-i yed ve müdde‘î-i mezbûr es-Seyyid Abdullah’a teslîme mezbûr Kömürcü es-Seyyid Ebûbekir’e tenbîh olunduğu İstanbul Mahkemesi’nden huzûr-ı [âlîlerine i‘lâm olundu.] Fî 2 Ş sene 1222.