İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 77 Hüküm no: 15 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadece simit, börek ve çörek pişirmek ve francala ekmeği pişirmemek üzere Moşo v. Samuel’e Ortaköy’de fırın açmasına izin verilmesi Francala tabh etmeyip ke’l-evvel börek ve simit tabhına izin. Sâdır olan fermân-ı âlîlerine imtisâlen mahrûse-i Galata’ya tâbi‘ Ortaköy’de börekçi ve simitçi olup arzuhâl eden Moşo v. Samuel Yahûdî meclis-i şer‘i’l-enverde habbâzân kethudâsı Mustafa Ağa ve nizâm ustası es-Seyyid İsmail Ağa ve sâirleri hâzır oldukları hâlde ben öteden beri karye-i mezbûrede börek ve simit tabhıyla meşfûl olup francala tabh eylediğim yoğiken bu esnâda francala fırınları bâ-irâde-i aliyye yedi adede tenzîl ve tahsîs ve mâ‘adâsı bâ-fermân-ı âlî sedd ü bend olundukda beni dahi francala tabh eder deyü ihbâr etmeleriyle benim fırınım dahi bir takrîb sedd ü bend olunup bana gadr olmağla suâl olunup fırın-ı mezkûrumu börek ve simitçi fırını olarak küşâd ve tabh ve i‘mâlime ruhsat verilmek murâdımdır deyü istirhâm eyledikde hâzırûn-ı mezbûrûn dahi hakīkat-i hâl mersûm Moşo Yahûdi’nin istirhâmı üzere olduğunu ihbâr ve mersûm Moşo Yahûdî ancak fırın-ı mezkûrda börek ve çörek ve simit tabh edip kat‘a francala tabhına ictisâr etmemek üzere ta‘ahhüd ve eğer hilâf-ı ta‘ahhüd hareket eder ise vaz‘-ı kürek birle tedîb olunmağa dahi râzı olmağla fırın-ı mezkûrun küşâdına ve kemâ-fi’l-evvel börek ve simit tabhına ruhsat verilmek iktizâ eylediği İstanbul Mahkemesi’nden huzûr-ı [âlîlerine i‘lâm olundu.] Fî 15 Ş sene 1222.