İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 78 Hüküm no: 17 Orijinal metin no: [2a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata’da Sinanpaşa Vakfı’ndan yanmış olan saatçi dükkânlarının kiracılar tarafından vakfa bağış olarak yeniden inşası ve Başmuhasebe’de kiracılar adına gediklerinin kaydedilmesi Galata’da sâ‘atçi gediği, Ma‘rûz Sâdır olan fermân-ı âlîlerine imtisâlen hâmiş-i arzuhâlde mastûr Başmuhâsebe’den muhrec derkenâr nâtık olduğu üzere mahrûse-i Galata’da Perşembepazarı nâm mahâlde Voyvoda Konağı karşısında kâin bir köşeden bir köşeye varınca ancak bir menzil kapısı olup mâ‘adâ nesne olmayarak bir birlerine muttasıl Sinanpaşa Vakfı musakkafâtından on iki bâb muhterik sâ‘atçi dükkânlarının müstecirleri ve gedik sâhibleri ashâb-ı arzuhâl Serope v. Kigork ve Oseb v. Kirkor ve Artin v. Serope ve Oseb v. Bağdisar zimmîler kendi nefislerinden asâleten ve Agob v. Ohannes ve Limi v. Vastirlan ve Artin v. Avadik ve diğer Artin v. Abraham ve Nogal v. İstenas ve Anton v. İkta ve diğer Anton v. Rapael ve şerîki Viçen v. Agob zimmîler taraflarından husûs-ı âti’l-beyânda vekîl-i sâbitü’l-vekâleleri olmağla vekâleten meclis-i şer‘-i münîrde dekâkin-i mezkûrun vakf-ı müşârün-ileyh temessüküyle mutasarrıfesi olan Defterdâr-ı esbak merhûm Ali Raik Efendi kerîmesi Hadice Hanım tarafından vekîl olduğu zâtını ârifân Ömer Efendi b. Hasan ve es-Seyyid Mehmed Ağa b. Mahmud şehâdetleriyle sâbit olan Süleyman Efendi b. Ahmed mahzarında bâlâda mezkûr dekâkin beher şehr üçer guruş kirâ ile beher birimizin taht-ı icâremizde iken bundan akdem vukū‘ bulan harîkde dekâkin-i mezkûr külliyen muhterik olmağla mutasarrıfesi müvekkile-i mûmâ-ileyhânın binâya kudreti olmayıp dekâkin-i mezkûrelerin gedikleri yedimizde mülklerimiz olduğuna binâen kendi mâllarımızla teberru‘an li’l-vakıf binâ ve inşâ etmek üzere bizler ta‘ahhüd ve mutasarrıfesi mûmâ-ileyhâ dahi ziyâde kirâ artırmamak veyâhûd [2b] akār-ı âhara tebdîl dâ‘iyesi ve âhar gûne bahâne ile bizleri ihrâca tasaddî ve rencîde etmemek üzere ta‘ahhüd ve dekâkin-i mezkûreyi kaydı mûcebince kirâ-yı kadîmleri olan şehriye üçer guruş icâre ile bizlere îcâr ve teslîm bizler dahi ber-vech-i muharrer istîcâr ve kabûl eyledik deyü ikrâr ve vekîl-i merkūm Süleyman Efendi dahi ba‘de’t-tasdîk hâmiş-i arzuhâlde mastûr derkenâr mantûkunca dekâkin-i mezkûr gedikleri Başmuhâsebe Kalemi’nde mu‘teber gediklerden olup lâkin mersûme Serope v. Kigork zimmî üzerinde mukayyed iki bâb sâ‘atçi dükkânı olup mâ‘adâ on bâb sâ‘atçi dükkânlarının gedikleri tedâvül-i eyâdî ile işbu mersûmûnun yedlerinde olmağla on bâb dükkân gedik sâhibleri müstecirûn-ı mersûmûndan birer aded dükkân gediğine nısfiyet üzere mâlikler olan Anton v. Rapael ve şerîki Viçen v. Agob zimmîlere iştirâken her birlerinin isimleri tasrîhiyle zikr olunan Voyvoda Konağı karşısında baş tarafda birinci dükkân gediği mâliki Agob v. Avanes ve ikinci Oseb v. Kirkor ve üçüncü Limi v. Vastirlan ve dördüncü Artin v. Serope ve beşinci ve altıncı Serope v. Kigork ve yedinci diğer Artin v. Avadik ve sekizinci âhar Artin v. Abraham ve dokuzuncu Nogal v. İstenas ve onuncu Anton v. Akna ve on birinci diğer Anton v. Rapael ve şerîki Viçen v. Agob ve on ikinci diğer Oseb v. Bağdisar zimmîler uhdelerine Başmuhâsebe’ye kayd ü sebt ve her birinin yedlerine başka başka sûret i‘tâ olunmak bâbında istid‘â-yı inâyet eyledikleri İstanbul Mahkemesi’nden huzûr-ı [âlîlerine i‘lâm olundu.] Fî 8 Ş sene 1222.