İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 80 Hüküm no: 18 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Selim Han Vakfı’ndan Üsküdar’da bulunan boyahanenin kiracılarının vakfiyeye aykırı ödedikleri parayı geri alarak boyahaneyi vakfa teslim etmeleri Üsküdar’da Selîmiye’de alboyacılara dâir, Ma‘rûz İşbu takrîr bâlâsına şeref-rîz-i sudûr eden mübâret hatt-ı hümâyûn-ı inâyet-makrûn mûcebince sâdır olan fermân-ı âlî-şâna imtisâlen Hudâvendigâr-ı sâbık Sultan Selim Han hazretlerinin medîne-i Üsküdar’da binâ ve ihyâ buyurdukları câmi‘-i nev-bünyâd-ı mu‘allâ ve meberrât-ı sâireleri evkāf-ı şerîfelerinin kāimmakām-ı mütevellîsi hâlâ mehd-i ulyâ ve setrî-i kübrâ hazretlerinin kahvecibaşılığı hizmet-i celîlesiyle hâiz-i teşerrüf ve imtiyâz olan Abdurrahman Efendi b. Mehmed tarafından vekâleti teberdârân-ı Saray-ı atik-i ma‘mûreden Ahmed Ârif Ağa b. Ali ve Salih b. Salih şehâdetleriyle sâbit olan Mehmed Emin Efendi b. Yusuf bi’l-ma‘iye rü’yete memûr haremeyn-i şerîfeyn müfettişi ve müderrisîn-i kirâm-ı zevi’l-ihtirâmdan fazîletlü el-Hâc Mehmed Fikri Efendi ile du‘âhânemizde ma‘kūd meclis-i şer‘-i enverde vâkıf-ı müşârün-ileyh hazretlerinin medîne-i Üsküdar’da binâ ve inşâ buyurdukları vakf-ı şerîfleri musakkafâtından bir bâb al boyacı kârhânesinde bi’l-icâreteyn müstecirleri olan otuz sekiz nefer zimmîlerden Lanberto ve Atanaş ve İsteryan ve Toma ve Yanaki ve Dimitri ve Todoraki ve Kosti ve Kalodi ve Sotri ve İstavraki ve Todori ve Dimo ve Veraki ve Deşino ve Dimitri ve diğer Hıristo zimmîler kendi nefislerinden asâleten ve Nikola ve Anaştaş ve İksatola ve Aleksi ve İstati ve Kostandi ve Yani ve Todori ve Yani ve Aşkoli ve Menko ve Toma ve Panayot ve Kâhya Todori ve Yorgi ve diğer Todori ve Mihalaki ve Hıristo ve Manataka ve Karyota ve İksatoli taraflarından vekîlleri olmalarıyla vekâleten muvâcehelerinde vâkıf-ı müşârün-ileyh hazretleri kârhâne-i mezkûru vakfiye-i ma‘mûlün-bihâsında icâre-i vâhide-i sahîha ile îcârını şart etmiş iken müvekkilim mûmâ-ileyhin selefi olan kimesne kârhâne-i mezkûreyi bin iki yüz on yedi senesi hilâlinde mersûmûndan vakıf için on beş bin guruş mu‘accele kabz edip müeccele-i ma‘lûme ta‘yîni ile hilâf-ı şart-ı vâkıf icâre-i fâside ile mersûmûna bi’l-icâreteyn îcâr ve teslîm ve yedlerine temessükât i‘tâ edip lâkin kârhâne-i mezkûrun icâreteyn [ile] îcârı gayr-ı sahîh olduğundan başka mersûmûn kârhâne-i mezkûru ta‘tîl ve İstanbul’da Langa Yenikapısı’nda ahmâllerini kendülere tahsîs eyledikleri hem ibâdullâha gadrı ve hem vakf-ı şerîfe hasarı mûcib olmağla müvekkilim mûmâ-ileyh bi’t-tevliye fesh-i îcâr etmekle mersûmûn verdikleri mu‘accele-i mezkûreyi geri alıp kârhâne-i mezkûrdan keff-i yed ve cânib-i vakf-ı şerîf için bana teslîme tenbîh olunmak müvekkilim mûmâ-ileyhin murâdıdır deyü bi’l-vekâle eylediği da‘vâsını mersûmûn ikrâr ü i‘tirâf etmeleriyle mûcebiyle mu‘accele-i mezkûreyi alıp icâreteyn ile îcârın adem-i sıhhatine binâen kârhâne-i mezkûru vakf-ı şerîf için mütevellî-i müvekkil-i mûmâ-ileyhe teslîme mersûmûna tenbîh olunduğu İstanbul Mahkemesi’nden huzûr-ı [âlîlerine i‘lâm olundu.] Fî 14 Ş sene 1222.