İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 81 Hüküm no: 19 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akşemseddin Mahallesi Camii Vakfı Mütevellisi İsmail Efendi’nin azledilerek yerine Devatçı Ahmed Ağa’nın tayin olunması Nasb-ı mütevellî Ma‘rûz Nezâret-i dâ‘îlerinde olan evkāfdan İstanbul’da Akşemseddin Câmi‘-i şerîfi mahallesi İmâmı Mustafa Efendi ve Müezzin İbrahim Efendi ve ahâlisinden el-Hâc Mehmed Ağa ve Osman Efendi ve Ali Efendi ve Mahmud Ağa ve Haşim Efendi ve Mustafa Ağa ve sâirleri meclis-i şer‘-i münîrde mahalle-i mezbûre Câmi‘-i şerîfi mütevellîsi sâhib-i arzuhâl İsmail Efendi muvâcehesinde mütevellî-i mezbûr İsmail Efendi vakf-ı mezbûr musakkafâtından olup mahalle-i mezbûrede kâin bir bâb vakıf menzilin mutasarrıfesi Âişe’nin vâlidesi hâzıratü bi’l-meclis Rabia bt. Mustafa nâm hatun ile yekdil olup menzil-i merkūmu külliyen hedm ve enkāz-ı mevcûdesini mezbûre Rabia’nın âhara bey‘le istihlâkına mütevellî-i merkūm izin verip arsa-i sırfa kalmağla ol-vechile bedeline noksân terettüb ve vakf-ı mezbûra hasarât târî olmağla mütevellî-i merkūm İsmail Efendi’nin vakf-ı şerîfe ol-vechile zâhir olan hıyânetine binâen tevliyet-i mezbûreden azl ve umûr-ı tevliyete müdâhale etmemek üzere yerine cümle ahâli-i mahalle ve mürtezikanın muhtârı olan kimesne vakf-ı merkūma mütevellî nasb olunmak matlûbumuzdur dediklerinde gıbbe’t-tasdîki’ş-şer‘î mütevellî-i merkūm İsmail Efendi azlolunup ba‘de’l-yevm umûr-ı vakfa karışmamak üzere kendüye ba‘de’t-tenbîh câmi‘-i mezkûr vakfına ahâli-i mahallenin muhtârları olan işbu hâzır bi’l-meclis Devâtçı Ahmed Ağa b. Musa mütevellî nasb ü ta‘yîn olundukda ol dahi kabûl ve kemâ-yenbagī merâsimini edâya ta‘ahhüd edip bu vechile kat‘-ı münâza‘a eyledikleri İstanbul Mahkemesi’nden huzûr-ı [âlîlerine i‘lâm olundu.] Fî 8 Ş sene 1222.