İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 81 Hüküm no: 20 Orijinal metin no: [2b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Osman Ağa’nın İpek bükücü esnafı kethudalığına tayin olunması Bu i‘lâmda sehiv vâki‘ olmağla dört varaka aşağı sahîhi kayd olunup işbu kayd darb olunmuşdur. İhrâç olunmaya. [mühür] <> Ma‘rûz <<İstanbul’da Laleli Câmi‘-i şerîfi nezdinde Hudâvendigâr-ı esbak merhûm ve mağfûrun-leh Sultan Mustafa Han hazretleri vakf-ı şerîfleri musakkafâtından han derûnunda müsteciren mütemekkinler harîr bükmeden kırma hüseynî esnâfından ashâb-ı arzuhâl kırk nefer zimmîlerden ustabaşıları Lutfî ve Mardıros ve Karabet ve Sotri ve Arakil ve Kirkor ve Bogos ve Yani ve İstavri ve Zafiri ve Artin ve Toman ve Petro ve Avanes ve Gabril ve Tanaş ve Petro ve Yorgi ve İspandoni ve Yanaki ve İstemat ve Kalodi ve Todori ve Sava ve Bogos ve Serkiz ve Avanes ve Gabril ve Hırsaki ve Nikoli ve Bedos ve Bogos ve Serkiz ve sâirleri meclis-i şer‘-i enverde esnâf-ı mezbûreden es-Seyyid Osman Ağa b. el-Hâc Mehmed mahzarında bizler bundan akdem vakf-ı şerîf müsteciri olarak hân-ı mezkûra iskân olunduğumuzda hüseynî i‘mâlini kırk nefer zimmî ustalara hasr ve tahsîs etmiş idik. Lâkin bundan akdem sâir hüseynî ve kazzâz esnâflarıyla terâfu‘-i şer‘ olduğumuzda hüseynî i‘mâlinin bize mahsûsiyetini men‘ ü def‘ ve i‘lâm ve fermân olunmağla içimizden ba‘zıları bu vesîle ile itâ‘atimizden hurûc ve hân-ı mezkûru terk ve ta‘tîl eyledikleri vakfın hasâr ve bizim perîşâniyetimizi mûcib bir keyfiyet olduğundan mâ‘adâ içimizden ba‘zıları kalb ve redî i‘mâle cüret ederlerimiz olup ibâdullâha dahi hasarı müstevceb olmağla cümlemiz re‘âyâdan olmamızla nizâm-ı mer‘iyemizi tatbîkan umûr ve husûslarımız lâyıkıyla rü’yet ve idâreye muktedir ehl-i İslâm’dan bir kethudâmız olmadığından umûrumuz muhtel ve müşevveş olduğundan cümlemizin ittifâk ve ittihâdımız ile muhtâr ve müntahabımız olan pîr-perver ustalardan [3a] işbu mezbûr Osman Usta i‘mâl eylediğimiz beher kıyye hüseynîden yirmişer para kendülere ücret verilmek üzere taleb ve iltimâsımızla üzerimize kethudâ nasb ve yedine berât-ı âlî-şân i‘tâ olunup usta başımız mersûm Lutfî ile ma‘an ittifâk ve ittihâd ederek kâffe-i umûr ve husûsumuzu rü’yet ve idâre ve içimizden usta ve kalfalardan biri hân-ı mezkûru terk edip hâricde hüseynî i‘mâl etdirmeyip ve eğer ederi olur ise fi’l-asl rızâlarıyla iskân olunmuş olduklarından Vefa ahırında kırmızı pabuç i‘mâl eden dikiciler misillü men‘ ü def‘ olunması matlûbumuzdur deyü istid‘â eylediklerinde mezbûr es-Seyyid Osman Ağa dahi bi’t-taleb üzerlerine kethudâ nasb ü ta‘yîn olundukda ol dahi kethudâlık-ı mezkûru kabûl ve ustabaşı mersûm Lutfî zimmî ile bi’l-ittifâk hizmet-i lâzımesini kemâ-yenbagī rü’yet <> istid‘âları üzere yedlerine berât-ı âlî-şân i‘tâ buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu.]>> <>