İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 82 Hüküm no: 21 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise Hatun’un boşandığı eşi Seyyid Abdülkerim’de olan alacağının ödenmesi hususunda tenbihte bulunulması 400 guruşa sulh ve tecîl Ma‘rûz Sâhibe-i arzuhâl zatı mu‘arrefe Nefise bt. Mehmed Emin nâm hatun meclis-i şer‘-i enverde derûn-ı arzuhâlde mezkûrü’l-ism Dîvân-ı hümâyûn çavuşlarından zevc-i dâhili es-Seyyid Abdülkerim Çavuş b. Halil mahzarında mezbûr Abdülkerim Çavuş yetmiş guruş mehr-i müeccel ile zevc-i dâhilim olup hüsn-i mu‘âşeretimiz olmamağla mehr-i mezkûrum ve nafaka-i iddetim üzerlerine ve meûnet-i süknâm dahi kendi üzerime olmak üzere mezbûr ile ba‘de’l-hul‘ ve’l-kabûl mezbûr zimmetinde bâ-temessük karzdan alacağım olan beş yüz guruşdan bâ-tavassut-ı muslihîn dört yüz guruş üzerine ba‘de’s-sulh ve’l-kabûl İstanbul’da Çerâğī Hamza mahallesinde kâin Balcı Vakfı’ndan tasarrufumda olan bir bâb vakıf menzili dahi bâ-re’y-i mütevellî mezbûr Abdülkerim’e ferâğa ta‘ahhüd edip bedel-i sulh-ı mezkûru dahi işbu târih-i i‘lâmdan altmış gün mürûrunda Şevvâli’l-mükerremi’nin on beşinci günü edâ etmek üzere istimhâl etmekle, ben dahi rızâmla imhâl ve tecîl edip meblağ-ı müeccel-i mezkûr dört yüz guruşdan mâ‘adâ ziyâdesine ve hukūk-ı zevciyete ve sâire müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı müeccel-i mezkûr dört yüz guruşu ecel-i mezkûr hulûlünde müdde‘iye-i mezbûreye edâ ve teslîme mezbûr Abdülkerim Çavuş ta‘ahhüd eylediği İstanbul Mahkemesi’nden huzûr-ı [âlîlerine i‘lâm olundu.] Fî 15 Ş sene 1222.