İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 83 Hüküm no: 22 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Astarcı Ali’ye olan borcunu ödemesi hususunda Ahmed b. Abdullah’a tenbih olunması 200 guruşu edâya tenbîh, Ma‘rûz İstanbul’da Kilid Hanı’nda mütemekkin Astarcı Ali b. Hüseyin meclis-i şer‘-i münîrde tüccârdan Ahmed b. Abdullah muvâcehesinde mezbûr Ahmed târih-i i‘lâmdan dört gün mukaddem cemî‘ uyûbuyla altı kilim ve sekiz ağabânî ve üç Ahmediye ve nakden iki yüz guruş semen tesmiyesiyle işbu hâzır bi’l-meclis Selim b. Abdullah nâm bir re’s Abaza cinsinden gulâmımı mezbûr Ahmed’e bey‘ ü teslîm, ol dahi eşyâ-yı muharrere-i mezkûreyi bana def‘ ü teslîm etmekle nakd-i merkūm iki yüz guruş zimmetinde kalmağla taleb ederim deyü da‘vâ, ol dahi cevâbında zikr olunan gulâmın aklında halel olmağla redd-i mebî‘ olunmak murâdımdır deyü eylediği red da‘vâsını müdde‘î-i mezbûr ber-vech-i muharrer gulâm-ı merkūmu cemî‘ uyûbuyla eşyâ-yı mezkûre ile nakid iki yüz guruşa bey‘ini adl ve makbûlü’ş-şehâde idükleri zâhir olan Kastamonulu es-Seyyid Halil b. es-Seyyid Mehmed ve Hafız Mehmed Efendi b. el-Hâc Mustafa şehâdetleriyle bi’l-muvâcehe vech-i vecîh-i şer‘î üzere isbât etmeğin mûcebince gulâm-ı mezbûr müdde‘î-i mezbûr yedinde ibkā olunup semeni olan meblağ-ı mezkûr iki yüz guruşu müdde‘î-i mezbûr Ali’ye edâ olunmaya merkūm Ahmed’e tenbîh olunduğu İstanbul Mahkemesi’nden bi’l-iltimâs huzûr-ı [âlîlerine i‘lâm olundu.]