İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 84 Hüküm no: 23 Orijinal metin no: [3a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tülbentçi Avadis’in Baba İsmail ve sair kişilere olan borcundan indirim yaptıktan sonra kalan kısmı ödemesi 23331 guruşu 8186 guruşa sulh Ma‘rûz Mübârek rikâb-ı kamer-tâb-ı hüsrevânîye takdîm-i arzuhâl eden Dülbendci Avadis v. Bünyad zimmînin bâ-i‘lâm-ı mahkûmün-bih dâyinlerinden yedi yüz yirmi guruş iddi‘â eden Baba İsmail Ağa ve bin sekiz yüz elli guruş iddi‘â eden Şahinzâde el-Hâc Ahmed Ağa ve iki yüz yirmi guruş iddi‘â eden Hamud Ağa ve bin iki yüz elli beş guruş iddi‘â eden Cemâlîzâde es-Seyyid Mustafa Ağa ve üç yüz elli guruş iddi‘â eden el-Hâc Ebûbekir Ağa ve beş yüz guruş iddi‘â eden el-Hâc Mehmed Emin Ağa ve iki bin guruş iddi‘â eden Bursalı Emine Kadın ve bin altı yüz elli guruş iddi‘â eden Ankaralı Agob ve iki yüz guruş iddi‘â eden Andon zimmî ve iki yüz altmış bir guruş iddi‘â eden Kuyumcu zimmî ve üç yüz kırk yedi guruş iddi‘â eden Papa Apostol ve yüz kırk dört guruş iddi‘â eden Yenihan’da Şemanta ve altı bin yüz kırk bir guruş iddi‘â eden Menahim Yahûdî ve bin beş yüz guruş iddi‘â eden Kostandi ve üç yüz doksan beş guruş iddi‘â eden Toron zimmî ve beş yüz sekiz guruş iddi‘â eden Nefran zimmî ve sekiz yüz yirmi bir guruş iddi‘â eden Paspatı zimmî ve bin yedi yüz elli guruş iddi‘â eden Galata’da bâzergân Sazan ve altı yüz guruş iddi‘â eden Mıgırdıç zimmî ve yedi yüz seksen dokuz guruş iddi‘â eden Sarrâf Miran ve bâ-i‘lâm bin üç yüz yirmi beş guruş iddi‘â eden Dülbendci Asvador zimmîden her biri meclis-i şer‘-i münîrde medyûn-ı mersûm Dülbenci Avadis zimmî ile mahbûsen terâfu‘larında bizim cem‘an yirmi bir nefer Müslim ve zimmî kimesnelerin mersûm Avadis zimmî zimmetinde min-haysü’l-mecmû‘ yirmi üç bin üç yüz otuz bir guruş mahkûmün-bih alacaklarımız olup mersûmun hâlen ve def‘aten edâya iktidârı olmamağla ma‘lûmü’l-mikdâr eşyâ-yı mevcûdesi esmânından edâ-yı deyn irâdesinde olmağla bizler alacaklarımız olan meblağ-ı mecmû‘-ı mezkûr beher yüz guruşda altmış beşer guruşunu tenzîl ile otuz beş guruş ahz etmeğe râzı olduğumuzdan ol dahi eşyâ-yı ma‘lûmesini bi’t-terâzî âhara bey‘ ve semeninden edâ-yı deyn etmeğe ta‘ahhüd eylediğinden bizler dahi mecmû‘-ı müdde‘âmız olan yirmi üç bin üç yüz otuz bir guruşdan beher yüzde altmış beşer guruşunu tenzîl ile beher yüzde otuz beşer guruşdan cem‘an sekiz bin yüz seksen altı guruş üzerine mersûm Avadis zimmî ile sulh olup bedel-i sulhdan mâ‘adâ ziyâdesi olan beher yüz guruşda altmış beşer guruşdan on beş bin yüz kırk beş guruşa ve sâire müte‘allika da‘vâdan mersûm Avadis zimmînin zimmetini kabûlü hâvî her birimiz ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulhdan sekiz bin yüz seksen altı guruş zimmetinde dâyinleri mezbûrûna deyn-i sahîhi olduğunu mersûm Avadis zimmî kat‘a ikrâr ü i‘tirâf ve eşyâ-yı mevcûdesi esmânından edâ ve teslîme ta‘ahhüd edip bu vechile külliyen kat‘-ı münâza‘a eyledikleri İstanbul Mahkemesi’nden huzûr-ı [âlîlerine i‘lâm olundu.] Fî 7 Ş sene 1222.