İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 85 Hüküm no: 24 Orijinal metin no: [3a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun’un amcası Hafız İsmail Efendi’den kuruyemişci dükkânı gediğinden hisse talebi Mazbata derkenârı, Ma‘rûz İstanbul’da Kırkçeşme kurbünde Sekbânbaşı mahallesinde sâkin iken bundan akdem vefât eden Mehmed Emin Ağa b. el-Hâc Hüseyin’in verâseti sulbiye kebîre kızı Rukiye Hatun ile li-ebeveyn er karındaşı Hafız İsmail Efendi b. el-mezbûr el-Hâc Hüseyin’e münhasıra ve mesele-i mîrâsları iki sehmden olup bir sehmi mezbûre Rukiye Hatun’a ve bâkī bir sehmi karındaşı mezbûr Hafız İsmail Efendi’ye isâbeti tahakkukundan sonra sâhibe-i arzuhâl mu‘arrefetü’z-zât mezbûre Rukiye Hatun Çarşamba günü Arz Odası’nda huzûr-ı hazret-i Sadr-ı â‘zamîde ma‘kūd meclis-i şer‘-i enverde zikri âtî gedik âlâtına vaz‘-ı yedi mütehakkık olan ammi mezbûr Hafız İsmail Efendi mahzarında İstanbul’da Zindankapısı hâricinde Balmumcular karşısında vâki‘ bir bâb kuru yemişci dükkân gediğinin nısf-ı şâyi‘i ammim mezbûr Hafız İsmail Efendi’nin ve nısf-ı şâyi‘-i âharı babam müteveffâ-yı mezbûrun yedlerinde irsen mülkleri iken babam mezbûr fevt oldukda mâliki olduğu nısf gedik-i mezkûr benimle amcam mezbûr Hafız İsmail Efendi’ye münâsafeten mevrûs olup rub‘ âlât-ı mezkûre benim mülk-i mevrûsum olmuş iken ammim mezbûr mecmû‘unu fuzûlî zabt etmekle suâl olunup âlât-ı mezkûrenin rub‘-ı şâyi‘inden keff-i yedine tenbîh olunmak bi’l-verâse matlûbumdur deyü ba‘de’d-da‘vâ ve’s-suâl mezbûr İsmail Efendi cevâbında karındaşım ve mûrisim müteveffâ-yı mezbûr [3b] hayûtunda bin yüz yetmiş yedi senesinde âlât-ı mezkûreden mâlik olduğu nısf hisse-i şâyi‘asını bana dokuz yüz guruşa bey‘ ve teslîm ve semen-i mezkûru babamız müteveffâ el-Hâc Hüseyin’in terekesinden hisse-i irsiye-i ma‘lûmem olup makbûzu olmağla zimmetinde alacağım olan dokuz yüz guruşa bi’t-terâzî ba‘de’l-kabz ve’l-mukāssa ve’l-kabûl herbirimiz istifâ-yı hak etmemizle nısf gedik-i mezkûr dahi ol-vechile şirâen mülküm olmağla bi-hakkın vaz‘-ı yed ederim deyü eylediği def‘i sene-i sâbıkā Şa‘bâni’l-mu‘azzamının yirmi üçüncü günü Arz Odası’nda şâhide havâle olunup bir dahi meclis-i şer‘a gelmemeleriyle henüz da‘vâlarına faysal verilmeyip sûret-i da‘vâları bu vechile mazbût olduğu imtisâlen li’l-emri’l-âlî İstanbul Mahkemesi’nden huzûr-ı [âlîlerine i‘lâm olundu.] Fî 22 Ş sene 1222.