İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 86 Hüküm no: 25 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zahari v. Yorgaki’nin elinde olan bakkal dükkânı gediği hissesini Saltan bt. Marat ile kızı Koli’ye teslim etmesi Kocamustafapaşa’da bakkāl gediği’nin 30 sehmini teslîme tenbîh, Ma‘rûz İstanbul’da Kumkapı’da mütemekkin iken işbu târihden on dört sene mukaddem hâlik olan Bakkāl Andon v. Tiyohar? zimmînin verâseti zevce-i metrûkesi Saltan bt. Marat Nasrâniye ile ol târihde sagīre ve hâlen kebîre kızı Zoli Nasrâniyeye ba‘de’l-inhisâr arzuhâl eden şahısları mu‘arrefe mersûmetân Saltan ve Zoli Nasrâniyeden her biri Çarşamba günü arz odasında huzûr-ı hazret-i zü’l-makām-ı âlî-makāmda ve ba‘dehû du‘âhânemizde ma‘kūd meclis-i şer‘-i enverde zikri âtî bakkāl dükkânı gediğinin iki kıt‘a hüccet mûcebince mâlike olmağla vaz‘-ı yedi mütehakkık olan Zahari v. Yorgaki zimmî muvâcehesinde İstanbul’da Kocamustafapaşa’da el-Hâc Ali dükkânı demekle ma‘rûf bir bâb bakkāl dükkânı derûnunda mu‘teber gedik âlâtı yüz yirmi sehm i‘tibârıyla doksan sehmi âharın ve otuz sehm-i şâyi‘i mûrisimiz hâlik-i mersûm bakkāl Andon zimmînin ile’l-helâk yedinde mülk ve hakkı ve ba‘de helâkihî bize mevrûs olmağla bizim bi’l-irsi’ş-şer‘î zabt ve tasarrufumuz iktizâ eder iken mersûm Zahari zimmî fuzûlî zabt etmekle suâl olunup otuz sehm gedik-i mezkûrdan keff-i yed ve bize teslîme tenbîh olunmak murâdımızdır deyü ba‘de’d-da‘vâ ve’s-suâl mersûm Zahari zimmî cevâbında gedik-i mezkûrdan otuz sehm hisseye vaz‘-ı yedini ikrâr lâkin yedimde olan hüccetler nâtıka olduğu üzere mâlik olduğu Hıristo zimmî iki yüz on üç târihinde Yanago zimmî ba‘de’l-bey‘ ol dahi hâlik olup iki yüz yirmi târihinde veresesi bana bey‘ etmeleriyle şirâen mülküm olmak üzere zabt ederim deyü müdde‘iyân-ı mersûmetânın mûrisleri Andon zimmînin mülkü olduğunu ba‘de’l-helâk mersûmetâna mevrûs olduğunu inkâr etmekle müdde‘iyetân-ı mersûmetân ber-vech-i muharrer müdde‘âlarını lede’t-tezkiye istikāmetleri ihbâr olunan Papa Samuel v. Yorgi ve Papa Filosi v. Andon şehâdetleriyle bi’l-muvâcehe isbât etmeğin mûcebiyle dükkân-ı mezkûr gediğinin yüz yirmi sehm i‘tibârıyla otuz sehm-i şâyi‘inden keff-i yed ve müdde‘iyân-ı mersûmetâna teslîm etmek üzere mersûm Zahari zimmîye tenbîh olunduğu İstanbul Mahkemesi’nden huzûr-ı [âlîlerine i‘lâm olundu.] Fî 7 Ş sene 1222.