İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 86 Hüküm no: 26 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Firar eden Ali b. Mehmed ve İsmail b. Mehmed’in kasap dükkânı gediklerinin satılarak bedelinin alacaklılarına gurema usulüyle dağıtılması Firâr eden Kasab Ali’nin gediği deyni için âhara fürûht Ma‘rûz Vilâyet-i Rumeli’de Eflâk ve Boğdan celebânı meclis-i şer‘-i enverde Kasablar Kethudâsı Süleyman Ağa ve esnâfdan ma‘lûmü’l-esâmî kimesneler hâzır oldukları hâlde kasab esnâfından Cağaloğlu nâm mahâlde kâin kasab dükkânı gediğine mutasarrıf olan gāib ani’l-meclis Kasab İsmail b. Mehmed zimmetinde bizim ma‘lûmü’l-vezn lahm-ı ganem semeninden bâkī üç bin yüz on üç guruş alacağım olduğu hâlde merkūm İsmail bundan akdem firâr ve gaybet edip kasab esnâfının mutasarrıf oldukları gedikleri mâl-ı celebe mukābil olup mutasarrıf olduğu gediği ma‘rifet-i şer‘ ve esnâf ma‘rifetiyle âhara ferâğ olunup bedelinden alacağımızı istifâ etmek şurût-ı nizâm-ı mu‘tebereden olmağla gāib-i mezbûr altı aded dükkânda lahm bey‘le meşgūl olmağla altı aded dükkân gedikleri âhara ferâğ ile bedelinden alacağımızı istifâ murâdımızdır dediklerinde kasab esnâfı cevâblarında gāib-i mezbûrun ancak Cağaloğlu dükkânı gediği tasarrufunda olup ve Çatladıkapı’da kasab olmağla gāib-i mezbûra medyûn olduğu hâlde bundan akdem firâr eden Ali b. Mehmed’in mutasarrıf olduğu gediğinin dahi gāib-i mezbûra olan deyni için âhara ferâğı şurûtdan olmağla bu sûretde gāib-i mezbûrun ancak iki aded dükkân gediğinden gayrı gedikleri olmayıp zikr olunan gediklerin bedel-i ferâğları olan iki bin üç yüz guruş ve altı aded kanadâr zimmetlerinde cem‘an alacağı olan üç bin otuz üç buçuk guruş ki cem‘an beş bin otuz üç buçuk guruşdan gayrı ism-i mâl ıtlâk olunur kat‘a malı olmayıp ve müdde‘ûn-ı mezbûrûndan gayrı celebân-ı sâireye dahi bin altı yüz yetmiş altı buçuk guruş dahi deyni olup müdde‘ûn-ı mezbûrûnun alacakları ile cem‘an on bin yedi yüz seksen dokuz buçuk guruşa bâliğ olmağla mârrü’z-zikr gedikler bedeli ve zimemde olan malı beş bin otuz üç buçuk guruş düyûn-ı mezkûresine göre guremâ olunup celebân-ı mezbûrân hisselerine isâbet eden mikdârı ahz eylemeleri şurûtumuzdandır demeleriyle beynlerinde ba‘de’l-münâza‘a bâ-vesâtet-i muslihîn celebân-ı mezbûrân ber-vech-i muharrer guremâya râzı olmalarıyla firâriyân-ı mezbûrânın bâlâda mezkûr mutasarrıf oldukları gediklerini âhara ferâğa kıbel-i şer‘den vasî nasb olunan kasablar kethudâsı Süleyman Ağa meclis-i şer‘-i enverde kasablık uhdesinden gelmeğe muktedir olduğu ihbâr olunan bâ‘isü’l-i‘lâm es-Seyyid İbrahim b. Mustafa mahzarında firâriyân-ı mezbûrân İsmail ve Ali’nin mutasarrıf oldukları bâlâda mezkûr gediklerinin âhara ferâğı lâzım gelmekle bedel-i misliyle âhara bâ-re’y-i mütevellî ferâğ ve bedeliyle edâ-yı deyn olunmak şurût-ı mer‘iyemizden olduğuna binâen ben firâriyân-ı mezbûrânın gediklerini bedel-i ma‘lûm ve makbûz mukābelesinde bâ-re’y-i mütevellî mezbûr es-Seyyid İbrahim’e bi’l-vesâye ferâğ ve tefvîz, ol dahi tefevvüz ve kabûl etmekle fîmâ-ba‘d firâriyân-ı mezbûrânın zikr olunan gediklerde alâka ve medhalleri kalmayıp mezbûr es-Seyyid İbrahim’in dâhil-i havza-i tasarrufu olmuşdur deyü ba‘de’l-ikrâr ve’t-tasdîk gedik-i mezkûrlar firâriyân-ı mezbûrân üzerlerinden mezbûr es-Seyyid İbrahim üzerine tahrîr ve defter-i vakf-ı şerîfe kayd ü zabt ve tasarrufu için yedine müceddeden temessük i‘tâsı iktizâ eylediği İstanbul Mahkemesi’nden huzûr-ı [âlîlerine i‘lâm olundu.] Fî 15 Receb sene 1222.