İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 88 Hüküm no: 27 Orijinal metin no: [3b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anadolu’dan getirilen derilerin fiyatı hususunda kasap esnafı ile dericiler esnafı arasında anlaşma sağlanması Ağnâm derileri nizâ‘ı Ma‘ruz, Derûn-ı arzuhâlde mezkûrü’l-ism bi’l-cümle kasab esnâfının kethudâları Süleyman Ağa ve esnâfından Hafız el-Hâc Mehmed Emin Ağa ve Eğrikapılı Salih Ağa ve sâir ustalar bi’l-ma‘iye rü’yete memûr Haremeyn-i şerîfeyn müfettişi müderrisîn-i kirâm-ı zevi’l-ihtirâmdan fazîletlü el-Hâc Mehmed Fikri Efendi ile izzetlü Sekbânbaşı Ağa ve Kasabbaşı Ağa hâzır oldukları hâlde akd olunan meclis-i şer‘-i enverde bi’l-cümle debbâğânın beş ocak esnâflarının söz sâhibleri ma‘lûmü’l-esâmî kimesneler muvâcehelerinde işbu def‘a Anadolu cânibinden celebânın sevk ve tesyîr eyledikleri ağnâm cülûdunun ziyâdeye tahammülü var iken debbâğân esnâfı cülûd-ı mezkûreyi maktû‘dur deyü bizden on sekiz buçuk paraya cebren iştirâ irâdesinde olup bize ve celebân tâifesine gadr etmeleriyle suâl olunup zikr olunan derilerimizi değer bahâsıyla <> iştirâ eylemeleri murâdımızdır deyü bundan akdem münâza‘a eylediğimizde beynimiz ıslâh olunup beher ağnâm cülûduna fî-i sâbıkı üzerine beşer para zamla işbu def‘a vürûd eden ağnâm ve bundan böyle dahi tevârüd edecek ağnâm derilerini cümlesini yirmi üçer paraya iştirâya râzılar olup kat‘-ı nizâ‘ olunmuş iken debbâğ esnâfı cülûd-ı mezkûreyi ber-vech-i muharrer iştirâdan imtinâ‘ etmeleriyle suâl olunup rızâ-dâde oldukları üzere cümle ağnâm derilerini yirmi üçer buçuk paraya iştirâlarına tenbîh olunmak murâdımızdır dediklerinde debbâğân esnâfı cevâblarında işbu yedimizde olan bir kıt‘a mufassal ve meşrûh fermân-ı âlîde zikr ve beyân olunduğu üzere mukaddemâ kasab esnâfı [4a] bizimle yine zam iddi‘âsıyla münâza‘a eylediklerinde bizler Ayasofya-i kebîr ve Selîmiye Vakıfları’na merbût olduğumuzdan mâ‘adâ umûr-ı mühimme altında olduğumuza binâen iki para zamla on sekiz buçuk paraya iblâğ olunup ve fîmâ-ba‘d işbu nizâmın mugāyiri hareket hangi tarafdan zuhûr eder ise Selîmiye Vakf-ı şerîfi’ne yirmi beşer bin guruş nezre kat‘ olunmamızla tağyîrine bir vechile râzı değiliz, lâkin yedimizde olan fermân-ı âlî-şâna ve şurût-ı mu‘teberemize kat‘a halel gelmemek ve nizâmımız bozulmamak şartıyla ağnâm derilerinin fî-i sâbıkı olan on sekiz buçuk paranın üzerine beşer para zamla ancak işbu def‘a tevârüd eden yirmi bin mikdârı ağnâm derileri vakit ve hâle nazaran yirmi üç buçuk paraya iştirâya eğerçi Bâb-ı Âlî’de rızâ-dâde olmuş idik. Bundan böyle tevârüd edecek ağnâm derilerini fî-i maktû‘ası olan on sekiz buçuk paradan ziyâdeye iştirâ etmeyip ve yedimizde olan hutût-ı hümâyûnların bozulmasına kat‘a râzı değilleriz deyü mazmûnu min-külli’l-vücûh takrîr-i meşrûhlarına mutâbık şurût-ı nizâmlarını hâvî bir kıt‘a fermân-ı âlî-şân ibrâzlarıyla beynlerinde münâza‘aları imtidâdından sonra debbâğân esnâfı şurût ve kuyûdumuza kat‘a halel gelmeyip ve nizâmımız bozulmamak ve Rumeli ağnâmına ve işbu sene-i mübârekeden gayrı sinîn-i sâirede vürûd edecek ağnâma sirâyet etmemek şartıyla ancak vakit ve hâle nazaran işbu sene-i mübârekede Anadolu cânibinden vürûd etmiş işbu yirmi bin re’s ve vürûd edecek Karaman ağnâmı derilerini beşer para zamla yirmi üçer buçuk paraya iştirâya hâh ve nâ-hâh rızâ-dâde olmalarıyla kasab esnâfı dahi râzılar olup ol-vechile kat‘-ı nizâ‘ eylediklerini hâvî fermân-ı âlî sudûru niyâzında oldukları İstanbul Mahkemesi’nden huzûr-ı [âlîlerine i‘lâm olundu.] Fî 7 Ş sene 1222.