İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 89 Hüküm no: 28 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Mustafa Ağa’nın tütüncü dükkânı gediğini Yelpazecizade Molla Ahmed’e satması Tütüncü mahzeni bey‘ ve yedine sûret i‘tâsını istid‘â Ma‘rûz Âsitâne-i aliyye’de Tahmis kurbünde vâki‘ Ma‘den Kalemi’nde mastûr ve mukayyed bir bâb duhânî mahzeni gediği ta‘bîr olunan âlât-ı lâzıme-i ma‘lûmeye bâ-sûret-i hümâyûn mâliki olan Duhânî Mustafa Ağa b. Mehmed nâm kimesne Tütüncüler Kethudâsı İbrahim Ağa ve Yiğitbaşı es-Seyyid Abdullah ve Şehremînli Mustafa Efendi ve sâir mazbûtü’l-esâmî ihtiyârlar hâzır oldukları hâlde meclis-i şer‘-i münîrde Yelpazecizâde işbu bâ‘isü’l-i‘lâm Molla Ahmed b. el-Hâc Ali nâm kimesne muvâcehesinde takrîr-i kelâm edip bâlâda mezkûr bir bâb duhânî mahzeni derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmesini dört bin guruş semen-i makbûza tarafeynden bi’l-îcâb ve’l-kabûl bâtten ve sahîhan merkūm Molla Ahmed’e bi-safkatin vâhidetin bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl edip bey‘-i mezkûrun tağrîr ve gabnine ve bi’l-cümle gedik husûsuna müte‘allika âmme-i de‘âvîden herbirimiz âharın zimmetini kabûlü hâvî ibrâ ve iskāt eyleyip fîmâ-ba‘d zikr olunan bir bâb tütüncü mahzeni gediğinde benim aslâ ve kat‘a alâka ve medhalim kalmayıp merkūm Molla Ahmed’in mülk-i müşterâsı olmuşdur dedikde, ol dahi tasdîk etmeğin gedik-i mezkûrun kaydı Ma‘den Kalemi’nde bâyi‘-i merkūm Duhânî Mustafa Ağa’nın üzerinden ref‘ ü terkīn ve merkūm Molla Ahmed üzerine kalem-i mezbûra kayd ü sebt ve vech-i meşrûh üzere yedine bir kıt‘a sûret i‘tâ olunmak bâbında istid‘â-yı inâyet eyledikleri İstanbul Mahkemesi’nden huzûr-ı [âlîlerine i‘lâm olundu.] Fî 15 Ş sene 1222.