İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 90 Hüküm no: 29 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe’nin, Haseki Mehmed Emin Ağa aleyhindeki kahveci dükkânı gediği satışının iptali talebi Mazbata derkenârı, Ma‘rûz Sâhibe-i arzuhâl mu‘arrefetü’z-zât Şerife Âişe Hanım bt. es-Seyyid Mustafa meclis-i şer‘-i enverde derûn-ı arzuhâlde mezkûrü’l-ism Haseki Mehmed Emin Ağa b. İbrahim tarafından husûs-ı âtîde vekâleti es-Seyyid Mehmed b. Abdullah ve Salih b. Mustafa şehâdetleriyle sâbit olan sulbiye kızı zâtı mu‘arrefe Fatıma Hatun bt. el-mezbûr Haseki Mehmed Emin Ağa mahzarında İstanbul’da Sultan Ahmed Câmi‘-i şerîfi kurbünde Atmeydanı’nda Firuzağa Câmi‘-i şerîfi karşısında kâin bir bâb kahve dükkânı gediğini müvekkil-i mezbûr Mehmed Emin Ağa bundan akdem Başmuhâsebe’de mukayyed mu‘teber gediklerden olmak şartıyla bana yedi yüz guruş semen-i makbûza bey‘, ben dahi iştirâ ve tesellüm etmiş idim. Lâkin gedik-i mezkûr mukayyed ve mu‘teber gediklerden olmamağla dükkân-ı mezkûrun mutasarrıfları bu esnâda fesh-i icâre birle gedik-i mezkûru mahv ve ilgā etmeleriyle semen olmak üzere medfû‘um olan yedi yüz guruşu şartla bey‘in fesâdına binâen müvekkil-i mezbûrdan istirdâd ederim deyü ba‘de’d-da‘vâ vekîl-i mezbûr cevâbında gedik-i mezkûru müvekkil-i mezbûr yedi yüz guruş semen-i makbûza bey‘ini ikrâr, lâkin şart-ı mezkûru inkârından mâ‘adâ işbu yedimde olan bir kıt‘a tahvîl mantûkunca müvekkilim babam mezbûr gedik-i mezkûru müdde‘iye-i mezbûreye cânib-i bey‘inde müdde‘iye-i mezbûrenin karındaşı işbu hâzır bi’l-meclis müderrisîn-i kirâmdan es-Seyyid Mustafa Efendi tarafından vekîli olarak akdiyle iştirâ ve gedik-i mezkûre ve semen-i merkūma ve sâire müte‘allika âmme-i da‘vâdan müvekkilim mezbûrun zimmetini müvekkilesi müdde‘iye-i mezbûreye izâfetle bi’l-vekâle kabûlü hâvî ibrâ ve iskāt etmiş idi deyü eylediği ibrâ ve kabûl müdde‘âsını müdde‘iye-i mezbûre ve hâzır-ı mezbûrdan her biri inkâr etmeleriyle vekîl-i mezbûr beyâna havâle olunup bir dahi meclis-i şer‘a gelmemekle henüz da‘vâlarına faysal verilmeyip bu vechile mazbût olmağın imtisâlen li’l-emri’l-âlî sûret-i zabtı İstanbul Mahkemesi’nden huzûr-ı [âlîlerine i‘lâm olundu.] Fî 29 Receb sene 1222.