İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 90 Hüküm no: 30 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İpek dolapçıları esnafı ile ibrişim bükücü esnafının çapar olarak bilinen ipeği birlikte imal etmeleri Dolapçı esnâfı çaparcılar nizâ‘ı, Ma‘rûz Ashâb-ı arzuhâl Harîr Dolapçıları Esnafı Kethudâsı Mehmed Said Ağa ve esnâfından es-Seyyid Mehmed ve el-Hâc Mustafa ve Ahmed Efendi ve Mehmed Emin ve es-Seyyid Mehmed ve Mehmed Ârif ve Ali ve Hüseyin ve Süleyman ve sâirleri Çarşamba günü Arz Odası’nda huzûr-ı hazret-i kāimmakām-ı âlî-makāmda ve ba‘dehû du‘âhânemizde ma‘kūd meclis-i şer‘-i enverde kazzâz ustabaşılarından Aslan ve Yako ve Yasef ve diğer Yasef ve Salamon ve İsak ve Nesim ve Sabatay ve Davit ve Haşır ve Çukacıoğlu Salamon ve sâirleri hâzırûn oldukları hâlde derûn-ı arzuhâlde mezkûr İstanbul’da Fazlı Paşa Sarayı’nda mütemekkin ibrişim bükücü ustalarından Ahmed ve Seyyid Mehmed ile Kirkor ve Yorgo ve Kigork ve Bedros ve Takor ve Agob ve Andon ve sâirleri muvâcehelerinde bizler ve ibrişim bükücü tâifesi kadîmden hâzırûn-ı mersûmûn kazzâz esnâfının ecîrleri olmamızla kadîmü’l-eyyâmdan beri san‘atımızdan olup işbu yedimizde tecdîdden olan fermân-ı âlîde mezkûr çapar ta‘bîr olunur harîri gerek bizler ve gerek mezbûrûn cümlemiz iştirâk üzere ücret ile i‘mâl ve tarafeyn bir birlerimizin i‘mâline kat‘a müdâhale etmeyip evlâd ü iyâlimizle ta‘ayyüş üzereler iken mezbûrûn bundan akdem i‘mâl eyledikleri beher tefe harîrde Selîmiye Vakf-ı şerîfi’ne mâl sâhibleri olan kazzâz esnâfının verdikleri otuz parayı kābız-ı mâlları olan Muhtâr zimmî kazzâz esnâfından cem‘ ü tahsîl ve cânib-i vakf-ı şerîfe edâ ve teslîmde suhûlet için bizimle iştirâke kanâ‘at etmeyip i‘mâlini bir-takrîb kendülere hasr ve tahsîs ve bizlere gadr-ı sarîh etmeleriyle suâl olunup mezbûrûnun mahsûsiyetleri men‘ olunup kadîmî üzere bizim dahi iştirâken i‘mâlimize ruhsat-ı şer‘î verilmek murâdımızdır deyü ba‘de’d-da‘vâ ve’s-suâl ibrişim bükücü cevâblarında yedimizde olan bir kıt‘a i‘lâmda zikr ü beyân olunduğu üzere müdde‘iyûn-ı mezbûrûn çapar ta‘bîr olunur harîr i‘mâlini rızâlarıyla bize terk ve tahsîs etmişler idi. Kadîmî üzere ruhsat verilür ise kābız-ı mâl-ı mersûma otuz parayı tahsîlde su‘ûbet olacağı derkârdır deyü çapar ta‘bîr olunur harîrin kadîmden dolabçı esnâfı ile iştirâk üzere ücret ile i‘mâl eylediklerini ve bundan akdem bir-takrîb kendülere hasr etdirdiklerini ikrâr ü i‘tirâf etmeleriyle mûcebince zikr olunan çapar ta‘bîr olunur harîrin kadîmî üzere cümlesinin i‘mâlleri iktizâ eylediği tarafeyne ba‘de’t-tefhîm kazzâz esnâfı hâzırûn-ı mezbûrûn tarafeynin i‘mâl eyledikleri beher tefe harîrde cânib-i vakf-ı şerîfe veregeldikleri otuzar parayı mâllarından tamamen kabza memûra edâ ve teslîme ve eğer edâda muhâlefet için harîr kaçırırlar ise beher tefe harîrde cânib-i vakf-ı şerîfe üç yüz guruş nezir ve dolapçı esnâfı dahi kazzâz esnâfının cânib-i vakfa vermeğe ta‘ahhüd eyledikleri otuz parayı tamamen verdiklerini tahkīk etmedikçe i‘mâl eyledikleri harîri kazzâza teslîm etmemeğe ta‘ahhüd ve eğer kable’t-tahkīk teslîm ederler ise kezâlik beher tefe harîrde cânib-i vakf-ı şerîfe yüz elli guruş nezir vermeğe ta‘ahhüd ve kethudâları Said Ağa dahi tekeffül etmeleriyle ibrişim bükücü esnâfının mücerred mukaddemâ ta‘ahhüde mebnî mugāyir-i kadîm ve muhâlif-i emr-i âlî bize mahsûsdur demeleri hilâf-ı şer‘-i şerîf olmağla kelâmlarına iltifât olunmayıp [4b] kadîmî üzere çapar ta‘bîr olunur harîri iştirâken ücret ile dolabçı esnâfının dahi i‘mâlleri iktizâ edip fîmâ-ba‘d ibrişim bükücü esnâfı tarafından mahsûsiyet iddi‘âsıyla müdâhale etdirilmemek bâbında dolabçı esnâfı yedlerinde olan emr-i âlînin istihkâmını hâvî ve dolabçı esnâfı cümlesi ehl-i islâm olup kadîmü’l-eyyâmdan beri kethudâları içlerinden iltimâslarıyla bâ-hüccet-i şer‘iye nasb olunagelmekle ecânibden kimesneye kethudâlık-ı mezkûre kat‘a müdâhale etdirilmemesini muhtevî bâlâsı tuğrâ-yı garrâ ile müveşşah bir kıt‘a fermân-ı âlî-şânım esnâf-ı merkūme yedlerine inâyet ve ihsân ve taraf-ı vakf-ı şerîfe dahi ilmühaberi i‘tâ olunmak üzere istid‘â-yı inâyet eyledikleri İstanbul Mahkemesi’nden huzûr-ı [âlîlerine i‘lâm olundu.] Fî-gurreti Şa‘bân sene 1222.