İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 92 Hüküm no: 31 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eftero ve kardeşi Kokana’nın, kardeşleri Pandeli aleyhindeki miras davasında anlaşma sağlanması Mîrâsdan 30 guruşa sulh Ma‘rûz Havâss-ı refî‘a kazâsına tâbi‘ Suyolu kurâlarından Kömürcü Belgrad karyesinde mütemekkin iken bundan akdem hâlik olan Panayot v. Tohari zimmînin verâseti sulbiye kebîre kızları Eftero ve Kokona Nasrâniyelere ve sulbî kebîr oğlu Pandeli zimmîye münhasıra ve mesele-i mîrasları dört sehmden olup iki sehmi oğlu mersûm Pandeli zimmîye ve birer sehmi mersûmetân Eftero ve Kokona Nasrâniyelere isâbeti tahakkukundan sonra arzuhâl eden şahsı mu‘arrefe mersûme Eftero Nasrâniye asâleten ve mersûme Kokona Nasrâniye tarafından husûs-ı âtîde vekâleti şahsını ârifân Yorgaki v. Londari ve Petro v. Astoraki şehâdetleriyle sâbit olan Yani v. Karyofil zimmî vekâleten bi’t-terâzî du‘âhânemizde ma‘kūd meclis-i şer‘-i enverde li-ebeveyn karındaşları mersûm Pandeli zimmî muvâcehesinde karye-i mezbûrede kâin ma‘lûmü’l-hudûd iki bâb mülk menzil babam ve mûrisimiz mersûmun ile’l-helâk mülkü olup ba‘de helâkihî bize mevrûs olmuş iken mersûm Pandeli zimmî menzileyn-i mezkûreyni müstakıllen zabt edip ve hâric ez-defter-i kassâm terekesinden yüz elli guruş kıymetli bir kebîr kazgan ile nakden bin üç yüz guruşunu kabz edip ve iki sene mukaddem sağlığında dahi iki yüz on altı guruşluk ma‘lûmü’l-mikdâr üzüm ve altmış guruşluk ma‘lûmü’l-mikdâr kirazını dahi kabz ve istihlâk ve mûrisimiz mersûm kable’l-ahz hâlik olmağla hisse-i irsiye-i ma‘lûmelerimizi taleb ederiz deyü eylediğimiz da‘vâmızdan menzileyn-i mezkûreynden bir bâb menzil arsasını mersûm Pandeli mûrisimiz babamız hâlik-i mersûmun sağlığında Petro v. Astoraki zimmîden semen-i ma‘lûme iştirâ ve malıyla üzerine menzil binâ ve işhâd eylediğini ve ol-vechile mülk-i mahzı olduğunu Dimitraki v. Londari ve Panayot v. Foti şehâdetleriyle muvâcehemizde isbât edip ve iki sene mukaddem kabz eylediği akçesi iki yüz on altı guruşa dahi sağlığında babamız mersûme def‘ ü teslîm eylediğini Dimitraki v. Mihal ve Mihal v. Kostandi şehâdetleriyle kezâlik muvâcehemizde isbât edip ve bin üç yüz guruş müdde‘âmıza dahi şâhidimiz olmamağla mukaddemâ mersûm Pandeli zimmîyi tahlîf etdirmiş idik ve menzil-i mezkûrun birini dahi terekeden olarak sekiz yüz guruşa âhara bey‘ olunup sekiz yüz guruş semeni defter-i kassâma idhâl ve hisse-i irsiyemizi kabz etmiş idik. El-hâletü hâzihî mersûm Pandeli zimmî cihet-i irsden zimmetinde bize ancak otuz altı guruş deyni olduğunu ikrâr edip mâ‘adâ münkir olduğu bir kazgan ve altmış guruşluk kirazdan hisse-i irsiye müdde‘âmızdan dahi bâ-tavassut-ı muslihîn mersûm Pandeli zimmî ile kat‘a li’n-nizâ‘ otuz guruş üzerine ba‘de’s-sulh ve’l-kabûl mukır olduğu otuz altı guruş ve bedel-i sulhdan dahi otuz guruş ki cem‘an altmış altı guruşdan mâ‘adâ ziyâdesine ve zikr olunan husûslara ve bi’l-cümle kalîl ü kesîr ve ma‘lûm ü mechûl tereke-i hâlik-i mersûma ve sâire müte‘allika mutlakan âmme-i da‘vâdan karındaşımız mersûm Pandeli zimmînin zimmetini kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ meblağ-ı mecmû‘-ı mezkûr asıl ve müvekkile-i mersûmetâna zimmetinde deyn-i sahîhi olduğunu mersûm Pandeli kat‘a ikrâr ve bi’t-taleb edâsıyla ilzâm olunduğu İstanbul Mahkemesi’nden huzûr-ı [âlîlerine i‘lâm olundu.] Fî 19 Ş sene 1222.