İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 93 Hüküm no: 32 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mustafa ve Seyyid Halil’in tütüncü dükkânı gediğini Hacı Mehmed Ağa’ya satmaları Tütüncü gediğini âhara bey‘, yedine sûret i‘tâ olunmasını istid‘â Ma‘rûz Ma‘den kaleminde mukayyed tütüncü gediklerinden olup İstanbul’da Tahmis etrâfında Taş Mahzenler demekle ma‘rûf mahzenlerden bir bâb kadîm tütüncü mahzeni derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin bâ-sûret-i hümâyûn mâlikleri es-Seyyid Mustafa b. es-Seyyid Ali ve es-Seyyid Halil b. es-Seyyid el-Hâc Ali nâm kimesneler tütüncüler kethudâsı ve yiğitbaşıları ve ihtiyârlarından mazbûtü’l-esâmî kimesneler hâzır oldukları hâlde meclis-i şer‘-i münîrde el-Hâc Mehmed Ağa b. Mehmed muvâcehesinde her biri takrîr-i kelâm edip bâlâda mezkûr bir bâb tütüncü mahzeni derûnunda mevcûde bi’l-münâsafe mâlikler olduğumuz âlât-ı lâzıme-i ma‘lûmeleri üç bin guruş semen-i makbûza tarafeynden bi’l-îcâb ve’l-kabûl bâtten ve sahîhan merkūm el-Hâc Mehmed Ağa’ya bi-safkatin vâhidetin bey‘ ü temlik ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl edip mebî‘-i mezkûrun tağrîr ve gabnine ve bi’l-cümle gedik husûsuna müte‘allika âmme-i de‘âvîden her birimiz âharın zimmetini kabûlü hâvî ibrâ ve iskāt eyleyip fîmâ-ba‘d zikr olunan tütüncü mahzeni gediğinde bizim aslâ ve kat‘a alâka ve medhallerimiz kalmayıp merkūm el-Hâc Mehmed Ağa’nın mülk-i müşterâsı olmuşdur dediklerinde ol dahi tasdîk etmeğin ber-mûceb-i şurût-ı nizâm-ı mer‘iye mârrü’z-zikr kadîm ve mu‘teber tütüncü gediğinin Ma‘den Kalemi’nden kaydı bâyi‘ân-ı mezbûrân es-Seyyid Mustafa ve es-Seyyid Halil üzerlerinden ref‘ ü terkīn ve müşteri-yi merkūm el-Hâc Mehmed’in ismine tasrîhan kalem-i mezbûra kayd ü sebt birle yedine sûret i‘tâsını istid‘â ve istirhâm eylediği İstanbul Mahkemesi’nden huzûr-ı [âlîlerine i‘lâm olundu.] Fî 24 Ş sene 1222.