İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 94 Hüküm no: 33 Orijinal metin no: [4b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Togodoş v. Mihal’in, Nikola v. Petro aleyhindeki mücevher kuşak ve rehin davasının reddedilmesi Mücevher altın kuşak rehin men‘i Ma‘rûz Arzuhâl eden sâbık Mora tercümânı Togodoş v. Mihal zimmî bi’d-defa‘ât Çarşamba günü Arz Odası’nda huzûr-ı hazret-i kāimmakām-ı âlî-makāmîde ma‘kūd meclis-i şer‘-i enverde Dülger kalfalarından derûn-ı arzuhâlde merkūmü’l-ism Nikola v. Petro zimmî muvâcehesinde müdde‘î-i mersûmun hâlen hizmetkârı Zantalı Dimitri Livic v. İstati zimmî hâzır olduğu hâlde işbu târihden iki sene mukaddem hizmetkârım hâzır-ı mersûm Dimitri Livic risâletiyle mersûm Nikola Kalfa’dan üç def‘ada karz aldığım yedi yüz guruş deynim mukābelesinde malımdan iki bin beş yüz guruş kıymetli iki başlı bir çift mücevher altın kuşağımı hâzır-ı mersûm yediyle mersûm Nikola Kalfa’ya irsâl ve yedine rehin vaz‘ ve teslîm etmiş idim. Hâlâ edâ-yı deyn birle rehn-i mezkûru fek ve bana teslîme mersûm Nikola Kalfa’ya tenbîh olunmak murâdımdır deyü ba‘de’d-da‘vâ ve’s-suâl mersûm Nikola Kalfa cevâbında ben malımdan hâzır-ı mersûma sekiz yüz guruş karz verip zikr olunan kuşağı hâzır-ı mersûm kendi malı olmak üzere deyn-i mezkûru mukābelesinde yedime rehin vaz‘ ve teslîm edip ba‘dehû deyn-i mezkûru olan sekiz yüz guruşu hâzır-ı mersûm bana edâ ve teslîm ben dahi yedimde rehin olan kuşağ-ı mezkûru malı olmak üzere hâzır-ı mersûm yedine fek ve teslîm etmiş idim deyü müdde‘î-i mersûma akçe ikrâzını ve zikr olunan kuşak müdde‘î-i mersûmun malı olduğunu ve yedinden irtihânını hâzır-ı mersûm ile her biri inkâr etmeleriyle müdde‘î-i mersûmdan ber-vech-i muharrer müdde‘âsına beyyine taleb olundukda lede’l-istimhâl ve’l-imhâl müddet-i mehl-i şer‘î mürûr edip ityân-ı beyyineden izhâr-ı acz ile istihlâf etmeğin mersûm Nikola zimmî bi’l-muvâcehe gıbbe’t-tahlîfi’ş-şer‘î mûcebiyle müdde‘î-i mersûm da‘vâ-yı mezkûresiyle mersûm Nikola zimmîye bilâ-beyyine mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu.] Fî 19 Ş sene 1222.