İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 97 Hüküm no: 36 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabzade Mehmed’in tasarrufunda olan tütüncü dükkânı gediğinin Mehmed Salih Beşe’ye satılması ve gediğin başka bir dükkâna taşınması Tütüncü Gediği Nakli Ma‘rûz Hâmiş-i arzuhâlde mastûr derkenâr nâtık olduğu üzere Ma‘den Kalemi’nde mukayyed tütüncü gediklerinden olup İstanbul’da Gedikpaşa’da bakkāl dükkânı karşısında kâin İmâm Mehmed Efendi dükkânı demekle ma‘rûf bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin tedâvül-i eyâdî ile mâliki Arabzâde Mehmed b. Abdullah meclis-i şer‘-i münîrde tütüncü esnâfından Mehmed Salih Beşe b. Hasan muvâcehesinde ber-vech-i muharrer mâlik olduğum gedik ta‘bîr olunan âlât-ı lâzıme-i mezkûreyi merkūm Mehmed Salih Beşe’ye dört yüz elli guruş semen-i makbûza tarafeynden bi’l-îcâb ve’l-kabûl bâtten ve sahîhan bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl edip mebî‘-i mezkûrun tağrîr ve gabnine ve bi’l-cümle gedik husûsuna müte‘allika âmme-i de‘âvîden her birimiz âharın zimmetini kabûlü hâvî ibrâ ve iskāt eyleyip fîmâ-ba‘d zikr olunan tütüncü gediğinde benim aslâ ve kat‘a alâka ve medhalim kalmayıp merkūm Mehmed Salih Beşe’nin mülk-i müşterâsı olmuşdur dedikde ol dahi ba‘de’t-tasdîk dükkân-ı mezkûrun mülk sâhibine lüzûmu oldukda gedik-i merkūmu âhar dükkâna nakl olunmak esnâfımızın bâ-fermân-ı âlî şurût-ı mer‘iyemizden olmağla gedik-i mezkûru kurb [ve] civârında yoğurthâne ittisâlinde Haremeyn-i Şerîfeyn Vakfı musakkafâtından bi’l-icâreteyn mutasarrıf olduğum menzilim tahtında kâin kimesnenin gediği olmayan bir bâb dükkânıma nakl ve ber-vech-i muharrer Kalemine kayd olunmak murâdımdır dedikde fi’l-hakīka bu makūle mukayyed ve mu‘teber olan gedikler hasbe’l-iktizâ kurb ve civârına nakli esnâf-ı merkūmenin bâ-fermân-ı âlî şurût-ı nizâm-ı mer‘iyelerinden olduğunu kethudâ ve yiğitbaşı ve sâirleri meclis-i şer‘de haber vermeleriyle zikr olunan Gedikpaşa’da bakkāl dükkânı karşısında kâin dükkânda İmâm Mehmed Efendi ismine mukayyed olan tütüncü gediği mârrü’z-zikr civârında mutasarrıf olduğu kendi menzili tahtında kâin dükkâna nakl ve mahâll-i evvelin kayd-ı atiki terkīn birle merkūmun ber-vech-i meşrûh bey‘inden merkūm Mehmed Salih Beşe uhdesine kayd ve mahâll-i sânîde mu‘teber olmak üzere yedine sûret i‘tâsını istirhâm eylediği İstanbul Mahkemesi’nden huzûr-ı [âlîlerine i‘lâm olundu.] Fî 21 Ş sene 1222.