İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 98 Hüküm no: 37 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zarfçı Serkiz’e kefaletten dolayı olan borcunu ödemesi hususunda Maryem bt. Avadik’e tenbihte bulunulması 400 guruş kefâlete hüküm Ma‘ruz, Arzuhâl eden Zarfçı Serkiz v. Bedros zimmî meclis-i şer‘-i enverde şahsı mu‘arrefe Maryem bt. Avadik nâm Nasrâniye muvâcehesinde mersûme Maryem Nasrâniyenin sadrî kebîr oğlu gāib ani’l-meclis Mosis zimmîye sene-i sâbıkā Ramazani’l-mübârekinin on beşinci günü çarşıda İmâm Ali Hanı’nda ikrâz ve teslîm eylediğim dört yüz seksen iki guruşun rızamla seksen iki guruşundan fâriğ olup bâkīsi olan dört yüz guruş bana deyni olduğunu nâtık gāib-i mersûm yedime bir kıt‘a temessük i‘tâ ve meblağ-ı mezkûra anası işbu mersûme Maryem Nasrâniye dahi bi’l-emr ve’l-kabûl kefîl ve zâmin olmağla meblağ-ı mezkûr dört yüz guruşu kefâlet-i mahkiyesine binâen mersûme Maryem Nasrâniyeden hâlâ taleb ederim deyü ba‘de’d-da‘vâ ve’l-inkâr müdde‘î-i mersûm ber-vech-i muharrer kefâlet müdde‘âsını lede’t-tezkiye müstakīm oldukları ihbâr olunan Kıbracı Artin v. Markar ve Kuyumcu Abraham v. Avanes zimmîler şehâdetleriyle bi’l-muvâcehe isbât etmeğin mûcebiyle meblağ-ı mezkûr dört yüz guruşu müdde‘î-i mersûm Serkiz zimmîye bi-hükmi’l-kefâle edâ ve teslîme mersûme Maryam Nasrâniyeye tenbîh olunduğu İstanbul Mahkemesi’nden huzûr-ı [âlîlerine i‘lâm olundu.] Fî 22 Ş sene 1222.