İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 98 Hüküm no: 38 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abacı Seyyid İbrahim’e havaleden dolayı olan borcunu ödemesi hususunda Sarandi v. Hıristo’ya tenbihte bulunulması 434 guruş havâleten hüküm, Ma‘rûz Bâ‘isü’l-i‘lâm Abacı es-Seyyid İbrahim b. Ömer meclis-i şer‘-i enverde Kalpakçı Sarandi v. Hıristo zimmî muvâcehesinde benim eşyâ-yı ma‘lûme semeninden gāib ani’l-meclis Dimitri zimmî zimmetinde dört yüz elli guruş alacağım olup gāib-i mersûmun dahi işbu mersûm Sarandi zimmî zimmetinde cihet-i deyn-i şer‘îden dörtyüz elli guruş alacağı olmağla gāib-i mersûm bin iki yüz yirmi iki senesi Saferi’l-hayrın gurresi günü üçümüz bir meclisde iken medyûnum gāib-i mersûm beni dört yüz elli guruş deyni ile işbu mersûm Sarandi zimmî üzerine havâle-i mukayyed ile havâle ve her birimiz havâleyi kabûl etmemizle meblağ-ı mezkûr cihet-i havâleden bana deyni olduğunu mersûm Sarandi zimmî ikrâr ve târih-i mezkûr ile yedime işbu bir kıt‘a deyn temessükünü i‘tâ etdikden sonra meblağ-ı mezkûrun on altı guruşunu bana edâ ve teslîm edip bâkīsi olan dört yüz otuz dört guruşu bi-hükmi’l-havâle mersûm Sarandi zimmîden hâlâ taleb ederim deyü ba‘de’d-da‘vâ ve’s-suâl mersûm Sarandi zimmî cevâbında gāib-i mersûma ol-mikdâr deyni olduğunu ikrâr lâkin havâle ve kabûl vukū‘unu inkâr etmekle müdde‘î-i mezbûr ber-vech-i muharrer müdde‘âsını Mehmed Tâhir Ağa b. Abdullah ve Osman Ağa b. Hasan nâm şâhideyn-i mu‘addileyn şehâdetleriyle bi’l-muvâcehe ber-nehc-i şer‘î isbât etmeğin mûcebiyle meblağ-ı bâkī-i mezkûr dört yüz otuz dört guruşu bi-hükmi’l-havâle müdde‘î-i mezbûra edâ ve teslîme mersûm Sarandi zimmîye tenbîh olunduğu İstanbul Mahkemesi’nden bi’l-iltimâs huzûr-ı [âlîlerine i‘lâm olundu.] Fî 17 Ş sene 1222.