İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 99 Hüküm no: 39 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Kozbekçilerinden Halil Ağa’ya havaleden dolayı olan borcunu ödemesi hususunda Ömer Ağa’ya tenbihte bulunulması 186 guruş hüküm, Ma‘rûz Sâbıkā Kozbekçisi derûn-ı arzuhâlde mezkûrü’l-ism Halil Ağa b. Mustafa tarafından husûs-ı âti’l-beyânda vekîl olduğu Hüseyin Ağa b. Ali ve Ahmed b. Mahmud şehâdetleriyle sâbit olan Mehmed Mesud b. Mehmed meclis-i şer‘-i enverde sâhib-i arzuhâl Boyabâdîzâde Ömer Ağa b. Ömer mahzarında mezbûr Ömer Ağa zimmetinde müvekkilim mezbûr Halil Ağa’nın ma‘lûmü’l-kıyye süd semeninden ba‘de’l-hesâb altı yüz altmış bir guruş alacak hakkı olup meblağ-ı mezbûru mezbûr Ömer Ağa’dan bi’l-vekâle hâlâ taleb ederim deyü da‘vâ eylediğimde mezbûr Ömer Ağa dahi cevâbında cihet-i mezkûreden müvekkilim mezbûra ol-mikdâr guruş deyni olduğunu ikrâr, lâkin meblağ-ı mezkûrun dört yüz yetmiş beş guruşunu işbu hâzır bi’l-meclis Haseki Mehmed Ağa b. Ali zimmetinde benim dahi ol-mikdâr alacağım olmağla üçümüz bir meclisde iken dâyinim müvekkil-i mezbûru ol-mikdâr deynim ile hâzır-ı mezbûr üzerine havâle-i mukayyede-i sahîha-i şer‘iye ile havâle ve her biri havâleyi ba‘de’l-kabûl ancak zimmetimde yüz seksen altı guruş bâkī deynim kalıp mâ‘adâ dört yüz yetmiş beş guruşdan zimmetim berîe olmuşdur deyü ba‘de’d-def‘ ve’l-inkâr dâfi‘-i mezbûr Ömer Ağa def‘-i mezkûrunu lede’t-tezkiye adâletleri zâhire Ömer Ağa b. Osman ve es-Seyyid İsmail Beşe b. es-Seyyid Eyüb şehâdetleriyle vekîl-i mezbûr Mehmed Mes’ûd ve hâzır-ı mezbûr Haseki Mehmed Ağa muvâcehelerinde ber-nehc-i şer‘î ba‘de’l-isbât mûcebiyle dört yüz yetmiş beş guruşu bi-hükmi’l-havâle müdde‘î-i vekîl-i mezbûra merkūm Haseki Mehmed Ağa’nın edâ ve teslîmi iktizâ edip ve mezbûr Ömer Ağa’nın ikrâr ü i‘tirâfıyla lâzım gelen yüz seksen altı guruşu müdde‘î-i vekîl-i mezbûra edâ ve teslîme mezbûr Ömer Ağa ilzâm olunduğu İstanbul Mahkemesi’nden huzûr-ı [âlîlerine i‘lâm olundu.]