İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 100 Hüküm no: 40 Orijinal metin no: [5b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Markos v. Karabet’in Kartal’da Soğancıbaşızade Fırını ile alakalı Ekmekçi Petro aleyhindeki davasının reddedilmesi Kartal’da ekmekçi fırını nizâ‘ı Ma‘rûz Arzuhâl eden Markos v. Karabet zimmî meclis-i şer‘-i enverde zikri âtî ekmekçi fırını gediğine bâ-hüccet şirâen mâlik olmağla vaz‘-ı yedi mütehakkık olan Ekmekçi Petro v. Hıristo zimmî muvâcehesinde Ali Ağa b. el-Hâc Ahmed hâzır olduğu hâlde medîne-i Üsküdar’da Kartal karyesinde kâin Soğancıbaşızâde Fırını demekle ma‘rûf bir kıt‘a ekmekçi fırını ber-mûceb-i temessük-i mütevellî hâzır-ı mezbûr Ali Ağa’nın taht-ı tasarrufunda ve derûnunda mevcûde gedik âlât-ı ma‘lûmesi dahi mülkü olmağla gedik âlâtını mezbûr Ali Ağa bundan akdem semen-i ma‘lûma mersûm Petro zimmîye bâ-hüccet bey‘ ve teslîm, ol dahi iştirâ ve tesellüm edip ol-vechile mülk-i müşterâsı olmağla vaz‘-ı yed edip lâkin yedimde olan Kapan nâib-i sâbıkın inhâsına mebnî i‘lâmda beş bâb ekmekçi fırınları ve iki bâb çörekçi ve simitçi fırınları gediklerine mâlik olup bundan akdem medyûnen firâr eden Yorgi ve Nikola ve Aksandi zimmîlere şurût üzere nasb olunan vasî bey‘inden semen-i ma‘lûme şurût üzere bana bey‘ ve teslîm olunan yedi kıt‘a fırın gediklerinin altı kıt‘asını işbu hâzır bi’l-meclis Yorgi zimmîye ben semen-i ma‘lûme bey‘ ve teslîm bir kıt‘asını mülkümde ibkā etmiş olup ve mukaddemâ fırın-ı mezkûr gediği taht-ı icâremde iken hâzır-ı mezbûr Ali Ağa’ya gedik kirâsı dahi vermemeğe mücerred i‘lâm-ı mezkûrda yedi kıt‘a fırın gediği muharrer olup hâzır-ı mezbûr Ali Ağa’nın mersûm Petro zimmîye bey‘ eylediği Soğancıbaşızâde Fırını gediği benim olmak iktizâ edip mülkümde ibkā eylediğim bir kıt‘a gedik mersûm Petro zimmînin olup vaz‘-ı yed eylediği gedik olmuş olmağla gedik-i mezkûru dahi benim zabt ve tasarrufum iktizâ eder iken mersûm Petro zimmî âhar arzuhâl hâmişinde mastûr Başmuhâsebe derkenârı nâtık olduğu üzere senin şurût üzere iştirâ ve ba‘dehû hâzır-ı mersûma bey‘ eylediğin ancak altı kıt‘a fırın gediğidir deyü gedik-i mezkûru fuzûlî zabt etmekle suâl olunup Soğancıbaşızâde Fırını gediğinden keff-i yed ve bana teslîme tenbîh olunmak murâdımdır deyü takrîr-i meşrûhu üzere Başmuhâsebe derkenârı ancak altı kıt‘a fırın gediği bey‘ ü şirâ olunduğunu ve Soğancıbaşızâde Fırını gediği hâzır-ı mezbûrun mülkü olup ve gedik kirâsı dahi verdiğini ve ba‘dehû mersûm Petro zimmîye bey‘ eylediğini ve ol-vechile mersûm Petro zimmînin bâ-hüccet mülk-i müşterâsı olduğunu mukırr u mu‘terif iken mücerred Kapan Nâib-i sâbıkın inhâsıyla yedimde olan i‘lâmın yedi kıt‘a gedik deyü tahrîr olunmuş olduğundan Soğancıbaşızâde Fırını gediği dahi benim olmuş olur demesi meşrû‘ olmamağla mersûm Petro zimmîye suâl dahi teveccüh etmeyip müdde‘î-i mersûm Markos zimmî da‘vâ-yı mezkûresiyle mersûm Petro zimmîye bî-vech mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu.] Fî 25 Ş sene 1222.