İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 101 Hüküm no: 41 Orijinal metin no: [5b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Seyyid Mustafa ve Ahmed Efendi’ye fırın ve değirmen kirasından olan borcunu ödemesi hususunda Nikola’ya tenbihte bulunulması Küçükpazar’da Ekmekçi fırını nizâ‘ı Ma‘rûz İstanbul’da Küçükpazar’da kâin bir kıt‘a ekmekçi fırını derûnunda beş taşlı ekmekçi değirmeninin bâ-temessük-i mütevellî nısfına mutasarrıf olan Derviş es-Seyyid Mustafa b. es-Seyyid İsmail asâleten ve nısf-ı âharına mutasarrıf Ahmed Efendi b. Mehmed tarafından vekâleti mezbûr Derviş es-Seyyid Mustafa ve Mustafa Ağa b. Abdullah şehâdetleriyle sâbit olan es-Seyyid Mehmed Ağa b. İbrahim vekâleten meclis-i şer‘-i enverde fırın ve değirmen-i mezkûrlarda mukaddemâ beher şehr altmışar guruş kirâ ile müşâhereten müstecir olan Nikola v. Nikoliçe zimmî muvâcehesinde mersûm Nikola zimmî bundan akdem değirmen ve fırın-ı mezkûrda beher şehr elli guruş kirâ ile dokuz ay bi’l-müşâhere müsteciren mütemekkin olmağla müddet-i mezkûrede zimmetinde müctemi‘ olan dörtyüz elli guruşun iki def‘ada yüz otuz beş guruşunu ahz ü istifâ etmemizle bâkīsi olan üç yüz on beş guruşu hâlâ taleb ederiz deyü ba‘de’d-da‘vâ ve’s-suâl, mersûm Nikola zimmî cevâbında bi-tamamihi ikrâr ü i‘tirâf edip lâkin fırın ve değirmen-i mezkûr ol esnâda ta‘mîre muhtâc olmağla mezbûrânın emirlerinsiz malımdan ol-mikdâr guruş sarf etmiş etmemle meblağ-ı bâkī-i mezkûru masrûfuma takas ederim deyü takrîr-i meşrûhu üzere emirlerinsiz masrûf müdde‘âsı meşrû‘ olmamağla kelâmına iltifât olunmayıp bî-vech mu‘ârazadan ba‘de’l-men‘ ikrâr ü i‘tirâfıyla lâzım gelen meblağ-ı bâkī-i mezkûr üç yüz on beş guruşu müdde‘iyân-ı mezbûrâna edâ ve teslîme mersûm Nikola zimmîye tenbîh olunduğu bi’l-iltimâs İstanbul Mahkemesi’nden huzûr-ı [âlîlerine i‘lâm olundu.] Fî 21 Ş sene 1222.