İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 102 Hüküm no: 42 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. 1222 Senesi Ramazan başlangıcının minarelerde kandil yakılarak ilan edilmesine dair ferman Ferman, Bâ-sah. İstanbul kādısı fazîletlü efendi, İşbu i‘lâmları mübârek rikâb-ı kamer-tâb-ı hüsrevâneye arz olundukda leyle-i merkūmede îkād-ı kanâdîl olunmasını mutazammın hatt-ı hümâyûn-ı şevket-makrûn şeref-rîz-i sudûr olmağla ber-muktezâ-yı hatt-ı hümâyûn leyle-i mezbûrede kanâdîl îkād eylemelerini bi’l-cümle selâtîn-i i‘zâm cevâmi‘-i şerîfesi kayyumbaşılarına tenbîh ve tekîde mübâderet eyleyesin deyü buyuruldu. Fî 28 Ş sene 1222. Ramazan-ı şerîf sübûtu Dergâh-ı felek-bünyân ve bârgâh-ı âsumân unvânları turâbına ma‘rûz-ı dâ‘î-i şâkirü’l-ihsânlarıdır ki Âsitâne-i sa‘âdet sekenesinden es-Seyyid Halil Efendi b. es-Seyyid Mustafa meclis-i şer‘-i hatîr-i lâzımü’t-tevkīrde kuzâtdan Mehmed Şâkir Efendi b. el-Hâc Ali mahzarında mezbûr Mehmed Şâkir Efendi zimmetinde işbu bin iki yüz yirmi iki senesi Şa‘bâni’l-mu‘azzamı’nın on yedinci gününe müeccel ve mev‘ûd bir aded çetari semeninden on beş guruş alacağım olup ve işbu târih-i i‘lâm günü olan yevm-i isneyn bi-hasebi’r-rü’ye Şa‘bâni’l-muazzamın on yedinci günü olup ol-vechile ecel-i mezkûr hulûl etmekle meblağ-ı mezkûru mezbûr Mehmed Şâkir Efendi’den hâlâ taleb ederim deyü ba‘de’d-da‘vâ ve’s-suâl mezbûr Şâkir Efendi cevâbında deyn-i müeccel-i mezkûru ikrâr ü i‘tirâf, lâkin işbu târih-i i‘lâm günü şehr-i mezbûrun on yedinci günü olup ecel-i mezkûr hulûl eylediğini inkâr etmekle müdde‘î-i mezbûrdan ber-vech-i muharrer müdde‘âsına beyyine taleb olundukda İstanbul’da Süleymâniye Câmi‘-i şerîfi muvakkiti Mahmud Efendi b. Hasan ve Topkapısı kurbünde sâkin Dîvân Kalemi kâtiblerinden Süleyman Efendi b. Mehmed Şâkir’den her biri şehr-i sâbık Recebi’l-ferd’in yirmi dokuzuncu Cum‘a günü Cumartesi gecesi ba‘de’l-gurûb semâda gaym ve illet olduğu hâlde matla‘-ı ehle olan ufk-ı garbda ve cevf-i semâda iki başları yukarı ve cânib-i kıbleye müteveccih iki sühâb beyninde hilâl-i Şa‘bâni’l-mu‘azzamı re’yü’l-ayn müşâhede eyledik ve işbu târih-i i‘lâm günü Şa‘bâni’l-mu‘azzamın on yedinci günüdür. Biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle gurre-i Şa‘bâni’l-muazzam Cumartesi gününden olduğuna ba‘de’l-hükm işbu târih-i i‘lâm günü şehr-i mezbûrun on yedinci günü olduğu sâbit olup ecel-i merkūm hulûl etmiş olmağla meblağ-ı mezkûr on beş guruşun müdde‘î-i mezbûra edâsıyla mezbûr Şâkir Efendi ba‘de’l-ilzâm bu sûretde Cumartesi’den tekmîl-i selâsîn ile Pazartesi günü gurre-i Ramazani’l-mübârek olup sıyâma şürû‘ ve ikdâm emr-i savâbü’l-ihtimâm olmağla kudûm-ı meymenet-lüzûm-ı mâh-ı mübârekini tebşîr ve i‘lân ve sürûr-ı endâz-ı kulûb-ı ehl-i îmân olmak için âdet-i hasene-i saltanat-ı seniyye ve de’b-i sa‘âdet-i hilâfet-i Osmaniye üzere kāmet-i zîbâ-yı minârât-ı cevâmi‘-i câmi‘atü’l-berekât ilbâs-kubâ-yı zerîn-nisâr-ı kanâdîl ile tezyîn olunmak bâbında ısdâr-ı fermân-ı cihân-mutâ‘ menût-ı irâde-i aliyye-i vâcibetü’l-ittibâ‘ idüğü İstanbul Mahkemesi’nden âsitân-ı âsumân-unvânlarına i‘lâm olundu. El-emrü li-veliyyü’l-emr. Fî 17 Ş sene 1222.