İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 103 Hüküm no: 43 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçübaşı mahallesi halkının şikâyeti üzerine İmam Seyyid Mehmed Said’in kendi isteğiyle görevini Hafız Abdullah Efendi’ye devretmesi İmâmet tevcîhi Ma‘rûz Ashâb-ı arzuhâl İstanbul’da Cerrâhpaşa kurbünde Kürkçübaşı mahallesi ahâlisinden Abdurrahman Ağa ve el-Hâc Ahmed Ağa ve Mehmed Emin Odabaşı ve el-Hâc Mahmud Efendi ve es-Seyyid Mahmud Efendi ve Yağlıkçı Mustafa Ağa ve Müezzin Emin Efendi ve Ali Ağa ve Mehmed Emin Ağa ve el-Hâc Hasan Ağa ve İbrahim Ağa ve el-Hâc Mustafa Ağa ve el-Hâc Mehmed Ağa ve Hasan Ağa ve es-Seyyid Mehmed Efendi ve el-Hâc Mustafa Ağa ve Mehmed Ağa ve sâir mazbûtü’l-esâmî kimesneler meclis-i şer‘-i enverde mahalle-i mezbûre İmâmı es-Seyyid Mehmed Said Efendi b. Abdurrahman muvâcehesinde mezbûr es-Seyyid Mehmed Said Efendi mahallemizde imâm olup lâkin kâffe-i ma‘âsî ve menâhîyi mürtekib olmağla vücûhla kendüden hoşnûd ve râzılar olmayıp müstekrehimiz olmağla mezbûr es-Seyyid Mehmed Said Efendi imâmetden azil ve mahallemizden ihrâç olunmak murâdımızdır deyü münâza‘aya mübâderet eylediklerinde beynleri ıslâh ve tevfîk olunmağla mezbûr es-Seyyid Mehmed Said Efendi, ben bâ-berât mutasarrıf olduğum İstanbul kādıları efendiler nezâretlerinde âsûde Kürkçübaşı Şemseddin Vakfı şerîfinden almak üzere yevmî on akçe vazîfe ile imâmet-i mezkûre cihetini hüsn-ı rızâ ve tayyib-i ihtiyârım ve ferâğ-ı mu‘teber-i kat‘î ile iki bin guruş bedel-i makbûz mukābelesinde lede’l-imtihân istihkākı nümâyân olup muhtâr-ı ahâli-i mahalle olan Hafız Abdullah Efendi b. Osman’a ferâğ ve tefvîz eylediğimde ol dahi ber-vech-i muharrer tefevvüz ve kabûl etmekle ben rızâmla mahalle-i mezbûreden dahi hurûca ta‘ahhüd eyledim ve imâmet-i mezkûrede kat‘a alâkam kalmadı deyü ba‘de’l-ikrâr ve’t-tasdîk bu vechile külliyen kat‘-ı münâza‘a ve ref‘-i muhâsama etmeleriyle imâmet-i mezkûre mezbûr es-Seyyid Mehmed Said Efendi ferâğından muhtâr-ı ahâli olan mezbûr Hafız Abdullah Efendi’ye vazîfe-i mersûmesiyle tevcîh ve yedine berât-ı şerîf-i âlî-şân inâyet ve ihsân buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu]. Fî 21 Ş sene 1222