İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 107 Hüküm no: 49 Orijinal metin no: [6b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Edhem Efendi’nin hamile olduğu gerekçesi ile iade etmek istediği Çerkes cariye Zibâ’nın hamile olmadığı anlaşıldığından isteğinin kabul olunmayacağı Câriye reddi men‘i Ma‘rûz Sâhib-i arzuhâl müderrisîn-i kirâmdan İbrahim Edhem Efendi b. Yazıcı Mehmed Efendi tarafından husûs-ı âti’l-beyânda vekîl olduğu Mustafa Ağa b. Ahmed ve Süleyman b. Abdullah nâm kimesneler şehâdetleriyle sâbit olan Ahmed Ağa b. el-Hâc Mustafa nâm kimesne meclis-i şer‘-i münîrde Esirci Seyrekbasan es-Seyyid Mustafa Ağa b. Hüseyin mahzarında târih-i i‘lâmdan yirmi gün mukaddem cemî‘ uyûbdan sâlime olmak üzere üç bin guruş semen tesmiyesiyle müvekkilim mûmâ-ileyhin iştirâ eylediği işbu hâzıratü bi’l-meclis Çerkesiyyetü’l-asl Müslimetü’l-mille çatık kaşlı, Zibâ nâm seyyibe câriyenin iki aylık hamli zâhir olmağla ol-vechile mu‘ayyebe ve ayıb-ı mezkûr şirâ târihinden kadîm ve inde’t-tüccâr noksân-ı semen îcâb eder uyûbdan olmağla redd-i mebî‘ olunmak muvekkilim mûmâ-ileyhin matlûbudur dedikde evvelâ teveccüh-i husûmet için bu makūle uyûbu teşhîse bâ-fermân-ı âlî ehl-i hibre ta‘yîn olunan kābile zâtı mu‘arrefe Hadice bt. Abdullah’a irâe olundukda ol dahi ba‘de’n-nazar câriye-i mevsûfe-i merkūmede el-yevm kat‘a haml olmadığını haber vermekle ol-vechile müvekkil-i mûmâ-ileyh da‘vâ-yı mezkûresiyle merkūm Esirci es-Seyyid Mustafa Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu]. Fî 3 Ramazan sene 1222.