İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 111 Hüküm no: 56 Orijinal metin no: [7a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Yani ve ortağı Nikola’nın Küçükpazar’daki bakkal dükkânı gediğinin yeni kiraladıkları dükkâna nakline izin verilmesi Küçükpazar’da bakkāl gediği mâddesi Ma‘rûz Hâmiş-i arzuhâlde mastûr derkenâr nâtık olduğu üzere Başmuhâsebe’de mukayyed bakkāl dükkânı gediklerinden olup İstanbul’da Küçükpazar kurbünde kâin Ahmed Beşe dükkânı demekle ma‘lûm bir bâb bakkāl dükkânı gediğine bâ-hüccet-i şer‘iye bi’l-münâsafe şirâen mâlikler olan sâhibey-i arzuhâl bakkāl tâifesinden Yorgi v. Yani ve şerîki Nikola nâm zimmîler meclis-i şer‘-i hatîrde bakkālân pazarbaşısı Süleyman Ağa ve Bölükbaşı es-Seyyid Ahmed ile nizâm ustalarından kabzımâl Todori ve Yazıcı İstati ve Yorgaki ve Dimitri ve İstavri ve Aci Taka ve Çakıroğlu Yorgi ve Şişman Aleksi ve Usta Rizo ve sâir zimmîler hâzır oldukları hâlde yedlerinde olan emr-i âlî-şânda zikr ü beyân olunduğu üzere Âsitâne-i aliyye ve Bilâd-ı selâse ve tevâbi‘lerinde li-ecli’z-zarûre gedik nakli ile müceddeden bakkāl dükkânı ihdâs ve küşâdı ve bakkāl gediği bey‘ ü şirâsı veyâhûd bakkāl tâifesinden biri gediğini zarûret-i deyn için dâyinine irhân iktizâ eyledikde pazarbaşı ve bölükbaşı ve Müslim ve zimmî ustalar ma‘rifetleriyle ancak İstanbul kādısı efendi huzûrunda cümlenin ihbârlarıyla i‘lâm ve hüccet olunmak ve mehâkim-i sâirenin birinde bakkāl gediği mübâya‘ası ve yâhûd gediği nakline dâir i‘lâm ve hüccet eder ise amel ve i‘tibâr olunmayıp ve nakl iktizâ etdikde gediği kimesnenin mülkü olmayan âhar dükkâna nakli mesbûk olup bizim sâlifü’l-beyân gediği mülkümüz olan Ahmed Beşe Dükkânı demekle ma‘lûm bakkāl dükkânı gediğinin nakli muktazî olmağla dükkân-ı mezkûr mahâlline fîmâ-ba‘d bakkāl dükkânı ihdâs olunmamak şartıyla gedik-i mezkûru bu esnâda havâlîsinde Odunkapısı dâhilinde Kutucularbaşı’nda Nalçacı dükkânı ittisâlinde kimesnenin gediği olmayan taht-ı icâremizde olan dükkâna nakl olunması iltimâs ve hâzırûn-ı mezbûrûn pazarbaşı ve bölükbaşı ve nizâm ustaları dahi şurût-ı mer‘iyeye ri‘âyet birle yerine bakkāl dükkânı [7b] ihdâs olunmamak üzere mahâll-i merkūma nakl olunmasında mahzûru mültezim nesne olmayıp ibâdullâha hayırlı ve enfa‘ olduğu cümlesi bi’l-ittifâk ihbâr ve vech-i meşrûh üzere nakli husûsu için dükkân-ı mezkûr gediğinin kaydı mahallî kaleminden ref‘ ve terkīn olunup gedik-i mezkûr mahâll-i merkūme nakl ve Başmuhâsebe’ye kayd ve mersûmân Yorgi ve şerîki Nikola zimmîler isimleri tasrîhiyle yedlerine münâsafeten başka başka sûret verilmek iktizâ eylediği İstanbul Mahkemesi’nden huzûr-ı [âlîlerine i‘lâm olundu]. Fî 10 N sene [1]222.