İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 112 Hüküm no: 57 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahaf Yusuf Efendi’nin, Çizmeci Seyyid Mehmed Beşe aleyhindeki menzil davasında anlaşma sağlanması Menzil Keşfi Ma‘rûz Sâdır olan fermân-ı âlîlerine imtisâlen kıbel-i şer‘den mürsel keşf nâibimiz Merhabâzâde Mahmud Efendi ve Hâssa mi‘mârı hulefâsından Mustafa ve Mehmed Emin halîfeler ile İstanbul’da Şeyh Ebulvefâ kurbünde Voynuk Şücâ‘ mahallesinde vâki‘ münâza‘un-fîh olan menzile varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm etdikde ashâb-ı arzuhâlden Sahaf Yusuf Efendi b. Veliyüddin ve Osman Ağa b. el-Hâc Hasan meclis-i ma‘kūd-ı mezkûrda derûnı arzuhâlde mezkûrü’l-ism Çizmeci es-Seyyid Mehmed Beşe b. Mehmed mahzarında merkūm es-Seyyid Mehmed Beşe bu esnâda menzilini hedm ve müceddeden binâ ve ihdas eylediği fevkānî sofasının üç aded direk arasından benim ve kezâlik fevkānî odasının üç aded pencerelerinden merkūm Osman Ağa’nın makarr-ı nisvân olan mevâzı‘larımıza nezâreti olup zarar-ı beyti olmağla men‘ ü def‘ olunmak matlûbumuzdur deyü da‘vâ etdiklerinde mi‘mârân-ı mezbûrân ve Müslimûn-ı hâzırûn ba‘de’l-keşf ve’l-mu‘âyene mezbûr es-Seyyid Mehmed Beşe rızâsıyla küşâd eylediği üç aded direk arasının köşe tarafında olan kadden bir zirâ‘ ve arzan bir zirâ‘ yirmi bir parmak bir aded direk arasını sedd ü bend ve iki aded direk arası önüne kendi açıklığından on beş arşın poyralık dikip ve Rumeli omurgası kuşaklama ve bir çifte kanadlık tahta ile mezbûr Yusuf Efendi’nin zarar-ı şer‘îsi def‘ oluncaya kadar tahta havâle ve mezbûr Osman Ağa tarafından odasından küşâd eylediği üç aded pencerelerini yeni kanad ve zahrlarına takoz vaz‘ ile zarar-ı şer‘îlerini mezbûr es-Seyyid Mehmed Beşe def‘a ta‘ahhüd ve bu vechile beynleri tevfîk ve ıslâh olunup kat‘-ı nizâ‘ eylediklerini mevlana-yı mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr-ı [âlîlerine i‘lâm olundu]. Fî 14 N sene 1222.