İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 113 Hüküm no: 58 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boyacı Todoraki’nin Çizmeci Foti’de olan alacağını taksitlendirmesi 605 guruş tecîl Ma‘ruz, Bâ‘isü’l-i‘lâm Boyacı Todoraki v. Mihal zimmî meclis-i şer‘-i enverde Çizmeci Usta Foti v. Ostoyan zimmî muvâcehesinde bin iki yüz yirmi senesi Şevvâli gurresinde mersûm Foti zimmî malımdan ve yedimden karz aldığı beş yüz guruş zimmetinde cihet-i mezbûreden bana deyni olduğunu nâtık târih-i mezbûrda yedime bir kıt‘a temessük dahi vermekle meblağ-ı mezbûr ile hâric-ez temessük kezâlik karzdan alacağım olan yüz guruş ki cem‘an altı yüz beş guruşu mersûm Foti zimmîden taleb ve da‘vâ eylediğimde ol dahi bi-tamamihi ikrâr lâkin hâlen ve def‘aten edâya iktidârı olmamağla meblağ-ı mezkûrun yüz beş guruşunu şehr-i âtî Şevvâli’l-mükerremi’nin üçüncü günü ve mâ‘ada beş yüz guruşu şehr-i âtî gurresinden beher şehr yirmi beşer guruşdan yirmi ay tamamında edâ etmek üzere istimhâl eylediğinde ben dahi rızâmla imhâl ve tecîl edip ve hâzır bi’l-meclis Dikicibaşı Süleyman Ağa dahi meblağ-ı müeccel-i mezkûru bi’l-emr ve’l-kabûl kefîl ve zâmin oldukda kefâletini dahi kabûl etmemle bu vechile kat‘-ı münâza‘a eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu]. Fî 7 N sene 1222.