İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 117 Hüküm no: 64 Orijinal metin no: [8a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aslan v. Anaştaş ile vefat eden Şerefiye bt. Misayel’in vârislerinin manav dükkânı gediğini nöbetleşe kullanmaları Zindankapısı’nda manav gediği mâddesi Ma‘rûz İstanbul’da Zindankapısı hâricinde Çardakönü’nde vâki‘ bir bâb manav dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmine mâlik olan Aslan v. Anaştaş ve on dokuz sehmine mâlik olan oğlu Kiryako nâm zimmîler asâleten ve on bir sehmine mâlik olup bundan akdem verâseti zevcesi Şerefiye bt. Misayel nâm Nasrâniye ile sulbî sagīr oğlu Akmiya ve sulbiye sagīre kızları Sofya ve Akmina’ya münhasıra olduğu hâlde hâlik olan Pretamoz zimmînin sulbî evlâdları sıgār-ı mersûmûnun vasîleri ve zevce-i mersûme Şerefiye Nasrâniyenin vekîl-i sâbitü’l-vekâlesi Lefter v. Misayel nâm zimmî herbiri meclis-i şer‘-i münîrde gedik-i mezkûrun altmış sehmine mâlik olan Abraham v. Avakim nâm zimmî muvâcehesinde dükkân-ı mezkûr bizimle müvekkile-i mersûmenin ve sıgār-ı mesfûrûnun ve mersûm Abraham zimmînin iştirâken taht-ı icâremizde olan dükkân derûnunda mevcûde gedik ta‘bîr olunur âlât-ı lâzıme-i mezkûr ber-i‘tibâr-ı merkūm yedimizde iştirâken ve şâyi‘an mülk ve hakkımız iken mersûm Abraham zimmî dükkân-ı mezkûrda ancak kendi târih-i i‘lâm senesi Rebi‘ülevveli gurresinden bir sene mütemekkin ve âlât-ı merkūmeyi dahi müstakıllen zabt ve tasarruf ve isti‘mâl etmekle ba‘dehû bizimle müvekkile-i mersûme ve sıgār-ı mesfûrûnun vasîleri ve vekîl-i mesfûr Lefter zimmî bi’l-ma‘iye zabt ü tasarruf ve isti‘mâl etmek üzere bundan akdemce beynimizde muhâyât etmemizle mersûm Abraham zimmî sene-i âtîye şehr-i Rebî‘ülevveli gurresine gelince bir sene dükkân-ı mezkûrda müsteciren mütemekkin ve derûnunda mevcûde gedik ta‘bîr olunur âlât-ı lâzıme-i merkūmeyi müstakıllen zabt ve tasarruf ve isti‘mâl edip bizimle müvekkile-i mersûme ve sıgār-ı mersûmûna geldikde gedik-i mezkûru bize teslîme mersûm Abraham zimmîye tenbîh olunmak bi’l-asâle ve bi’l-vekâle matlûbumuzdur deyü da‘vâ, mersûm Abraham zimmî dahi ber-vech-i muharrer ikrâr ve tasdîk ve nevbet-i tasarruf müdde‘iyûn-ı mersûmûn’a geldikde gedik ta‘bîr olunan âlât-ı lâzıme-i ma‘lûmeyi müstakıllen teslîm birle dükkân-ı mezkûrdan hurûca ta‘ahhüd ve bu vechile kat‘-ı nizâ‘ eyledikleri İstanbul Mahkemesi’nden huzûr-ı [âlîlerine i‘lâm olundu.] Fî 11 N sene 1222.